Accessibility links

шимбә, 10 декабрь 2016, Казан вакыты 00:23

İgor Levitin Ufağa eş säfärenä kilde


Comğa irtäsendä Ufağa Rusiäneñ transport ministrı İgor Levitin eş säfärenä kilde. Kön däwamında bik küp tözeleş urınnarında buldı ul. Mäğlüm ki, Ufada Başqortstannıñ Rus däwlätenä quşıluına 450 yıl tulunı bäyräm itügä äzerlek qısalarında baytaq zur tözeleşlär bara. Levitin äfände menä şul tözeleşlär barışı belän tanıştı. Mäskäw qunağın här cirdä Başqortstan prezidentı Mortaza Räximov, premyer- ministr Rafail' Baydäülätov häm başqa yuğarı citäkçelär ozatıp yörde.

İñ başta İgor Levitinnı Ufa xalıqara aeroportınıñ yaña binaları tözeleşe barışı belän tanıştırdılar. Biredä iñ zamança mömkinleklär bulaçağı äytelde. Xalıqara däräcägä citkerelüçe hawa alanı säğätenä 600гә yaqın keşene qarşı alu häm ozatu mömkinlegenä iä bulaçaq.



Säfäreneñ däwamında Rusiä transport ministrı Ufa timer yulı vokzalı bilämälärendäge zur tözeleşlärne dä qarap çıqtı. Anda da küptän yaña uñaylıqlar kiräk ide. Nihayät, yubiley sıltawı belän aña da çirat citte.

Annan soñ İgor Levitinğa Ufadağı tağın iñ zur yaña tözeleşneñ berse – Xalıqlar duslığı yortı binası tözeleşen kürsättelär. Mäğlüm buluınça, 450 yıllıq yubileynıñ iñ zur tantanaları näq menä şul binada ütäçäk.



Töştän soñ Başqortstan Xökümäte yortında, İgor Levitin qatnaşlığında, 450 yıllıq yubileyğa äzerlek mäs’älälären tikşergän kiñäşmä dä bulıp ütte. Anda Başqortstan citäkçeläre Rusiä ministrınnan respublikanıñ federal' däräcädäge töp yulların tözekländerügä aqça bülüne dä soradı. Ayıruça Çiläbe-Ufa-Samara yünäleşendäge yullar qotoçqıç naçar xälgä töşkän. Andağı yul häläkätläre dä yıldan-yıl arta. Ör-yaña mäğlümatlarğa qarağanda, Başqortstan yulları xäweflelek yağınnan Rusiädäge iñ qurqınıç berençe un töbäk isemlegenä kergän. Ul isemlektä Başqortstan cidençe, Tatarstan sigezençe urında ikän.

İgor Levitin, eş säfären tämamlap, comğa kiçen qaytıp kitte häm Başqortstanğa östämä finanslar bülärgä wäğdä itte.

Fänis Fätxi, Ufa

XS
SM
MD
LG