Accessibility links

пәнҗешәмбе, 8 декабрь 2016, Казан вакыты 15:00

AQŞ Däwlät Sekretare ike kön Mäskäwdä


Mäskäwgä AQŞ däwlät sekretare Condoleezza Rice kilde. Anı prezident Vladimir Putin, tışqı eşlär ministrı Sergei Lavrov häm başqa räsmilär belän oçraşular kötä. Rice''nıñ bu säfäre – Mäskäw belän Waşingtonnıñ torğan sayın ber bersen kübräk täñqitläwe sürätendä äzerlände. Rusiä prezidentı AQŞnıñ säyäsäte dönyağa qurqınıç tudıra, dip belderde. Waşington isä, Mäskäw ildä keşe xoquqları torışına küz yoma, di.

Rusiä räsmiläre AQŞ däwlät sekretare belän tınıç häm tıynaq söyläşülärgä äzerlänülären belderde. Ämma soñğı aylarda ike yaqnıñ ber bersenä atqan ğäyepläwlären iskä alğanda, söyläşülärne tınıç ütkärer öçen tırışlıq kiräk bulaçaq, di belgeçlär. Mäskäwdäge Heritage Foundation isemle oyışmanıñ säyäsi küzätüçese Yevgeny Volk, soñğı 20 yılnı alsaq bügenge köndä ike il arasında kierenkelek iñ yuğarı noqtasında, dip belderde.

Waşington belän Mäskäw arasında iñ zur fiker ayırmalıqları ike mäsälädä küzätelä. Berse – AQŞnıñ Könçığış Yevropada raketa qalqanu tözü plannarı, ikençese – Kosovonıñ kiläçäk statusı. Prezident Putin ike mäsälädä dä AQŞ qaraşına qarşı bulğanın belderde. Üzeneñ Münxenda yasağan yalqınlı çığışında, Rusiä prezidentı, AQŞnıñ tışqı säyäsäte – dönyadağı tınıçlıq öçen qurqınıç tudıra, dip belderde. Aprildä Rusiä, Yevropadağı raketa qalqanın tözügä cawap itep – Yevropadağı ğadäti qoral kileşüennän çığuın iğlan itte.

Yal könnäre BMOdağı Rusiä ilçese, Rusiäneñ İminlek Şurasında Kosovo turındağı qararğa veto salu ixtimalı zur, dip belderde. Waşington da Mäskäwgä üz täñqiten belderä. AQŞ Rusiäne Kremlne xakimiätne üz qulında tuplawda, keşe xoquqları bozıluğa küz yomuda, üz säyäsätlären könbatışqa taba yünältkän kürşeläre Gruziä häm Ukrainağa qarata qırıs mönäsäbättä toruda ğäyepli.

Waşington belän mönäsäbätne "tuñdırıbraq" toruda Mäskäwgä faydağa, dip sanıy Mäskäw Carnegie Üzäge belgeçe Maşa Lipman:

"Minemçä bez çığışı kürenmägän ber bocrağa kilep eläktek. Ber yämsez belderügä cawap itep ikençese kilep tora. Bu şulay däwam itä häm ber yaqnıñ da mönäsäbätlärne caylarğa teläge dä äzerlege dä yuq. Säbäplärneñ berse – ike ildä dä saylawaldı eşçänlege bara. Rusiädä saylawlar yaqınlaşqan sayın Könbatışqa qarşı qaraşlar kübräk qızdırıla."

Rusiädä parlament saylawları bıyıl dikaberdä, prezident saylawları kiläse yıl yaz köne ütäçäk. AQŞta prezident saylawları 2008 yılnıñ közenä bilgelängän.

Alsu Qormaş
XS
SM
MD
LG