Accessibility links

Кайнар хәбәр

Yewropa Berlege-Rusiä sammitına zur ömetlär bağlanmıy


Yewropa Berlegeneñ tışqı eşlär ministrları comğa könne, 18 mayda ütäçäk Yewropa Berlege-Rusiä sammitına äzerlek eşlären tämamlaw belän mäşğül. Ämma Berlek citäkçelegeneñ Mäskäw belän mönäsäbätläre şaqtıy kierenke buluın isäpkä alğanda, ministrlarğa söyläşülär öçen uñay yul tabu qıyın bulır kebek.

Yewropa Berlege tışqı eşlär ministrlarınıñ Samar sammitı turında Brüsseldä ütüçe söyläşüendä optimizm bik kürenmi diärgä bula. Berlek belän Rusiä arasındağı kierenkelek säbäple Samara sammitı ällä ni zur tärräqiät alıp kiler dip kötelmi. Yewropa Berlege anda töp iğtibarnı tağın da naçarayuğa yul quymawğa yünälter kebek. Taraflarnıñ Noyäber ayındağı Finländiä oçraşuınnan soñ küp waqıt uzmadı. Yaña strategik xezmättäşlek kileşüe tözü mäsäläse haman urınınnan quzğalmıy. Bıltır Rusiägä Polşada citeşterelgän it tarawların kertmäwgä cawap itep Polşa yaña strategik xezmättäşlek kileşüe turında söyläşülärgä veto salğan ide. Bıltır Litvadağı ber neft eşkärtü qorılması Polşa şirkätenä satılğannan soñ Rusiäneñ ul qorılmağa neft cibärüne tuqtatuına cawap itep xezmättäşlek söyläşülärenä Litva da qarşı çıqtı. 14-nçe mayda irtän isä Estoniä tışqı eşlär ministrı Urms Paet Berlek ministrların Tallin üzägennän Sovet Soldatı häykälen küçerügä bäyle Rusiä-Estoniä qarşılığında Estoniäne yaqlarğa çaqırdı. Estoniä Samar sammitın Eston xökümäteneñ internet säxifälärenä bulğan höcümnärgä häm Mäskäwdäge Eston ilçelege yanında köç qullanular belän ütkän protest çaralarına Mäskäw Kremleneñ qatnaşlığı turındağı ğäyepläwlärne kütärü öçen östämä ber uñay mömkinlek dip qarıy. Yewropa Berlege räsmiläre isä Rusiä inde üze dä yaña kileşü tözü mömkinlege belän bik qızıqsınmıy di. Rusiä bıyıl möddäte çığaçaq xäzerge Partnerlıq häm Xezmättäşlek kileşüen ozaytırğa ğına teli kebek. Samar sammitında Yewropa Berlege Rusiädä demokratiä häm keşe xoquqlarınıñ torışınä bäyle qayber borçıluların da belderer dip kötelä. Şulay da Samarda Berlekneñ mömkinlekläre çiklängän bulaçaq. Çönki Berlek möhin dönyaküläm mäsälälärdä Rusiäneñ xezmättäşlegenä moxtac. Şularnıñ iñ möhime Kosovo. Mäğlüm bulğança, Rusiä Könbatışnıñ Serbiädän ayırılırğa teläwçe Kosovoğa xalıqara küzätü astında bäysezlek birü täqdimenä qarşı çığa. Berlek öçen Rusiäneñ xezmättäşlege zarur bulğan möhim mäsälälär rätenä Iran häm Yaqın Könçığışnı da kertep bula.
XS
SM
MD
LG