Accessibility links

шимбә, 3 декабрь 2016, Казан вакыты 05:33

Qazanda Aq bars xokkey komandasın qotladılar


Qazanda sişämbe könne xokkey yaratuçılar öçen bik möhim kön. 15 mayda başqalada Aq bars xokkey komandasınıñ küptän tügel genä tämamlanğan Rusiä çempionatında ikençe urınnı yawlawın bilgeläp ütälär. Bıyıl Aq bars komandası uzğan yıldan ayırmalı bularaq altın tügel, kömeş medal’ ğına alsa da, tantanalar şaqtıy qupşı buldı, anda respublika citäkçelege genä tügel, xätta Mäskäwdän dä däräcäle qunaqlar da qatnaştı. Bäyräm östenä bäyräm digändäy, respublika sport söyüçelärenä tağın ber şatlıq. Tatarstannıñ Dinamo-Tattransgaz voleybol komandası Rusiädä berençelekne yawladı.

Qazannıñ Tatneft’ arena binası yanınnan sişämbe könne tağın maşinada tügel, xätta cäyäwläp tä ütärgä qıyın ide. 15 mayda monda Aq bars xokkey komandasın qotlarğa cıyıldılar. Xokkeyçılarnı Rusiä çempionatındağı ikençe urını belän genä tügel, Ewropa çempionnarı kubogın yawlaw belän dä qotlayaçaqlar bıyıl. Çarağa ğadi canatarlar ğına tügel, ä zur citäkçelärneñ dä kilüe, uramdağı bökelärne häm iminlek çaraların tağı da arttırdı. Alay da, zarlanuçı ällä ni bulmadı. Aq bars canatarlarınıñ mondıy ğına şartlarnı kürgäne bar. Bigräk tä, komandanıñ Qazandağı soñğı final uyınnarına bilet satıp alğannarnı iskä alsañ.

Aq barsnıñ Rusiä xokkey çempionatında bıyıl ikençe urın yawlawın bik zurlap bilgeläp üttelär. Tantanağa Mintimer Şäymiev, başqa respublika citäkçeläre, Mäskäw qunaqları - Rusiäneñ sport buyınça federal’ agentlıq citäkçese Vyaçeslav Fetisov, xokkey federatsiäse başlığı Vladislav Tret’yak häm başqalar kilde. Küp kenä maqtaw süzläre, därtle cır-buyülär yañğıradı bu bäyrämdä Aq bars xokkeyçıları, alarnıñ ostazları, yärdämçeläre xörmätenä. Şunısın da äytergä kiräk, bıyıl Tatarstan xokkeyınıñ 50 yıllığı da bilgeläp ütelä. Şuña da, bäyrämgä xäzerge uyınçılar ğına tügel, ä respublika xokkeyı veterannarı da çaqırılğan. Alar da bu yulı qotlawlar, büläklärsez qalmayaçaq. Kiçen qazanlılar respublika xokkeyçıları xörmätenä salyut ta küräçäk ikän äle. Xäyer, bäyräm cırlı-biyüle çaralar belän genä çiklänmi. Qazanda Aq barsnıñ yaña sport bazası açıldı. Şähär üzägendä urnaşqan Qazan şifaxanäse urınında xäzer xokkeyçılar yal itep, uyınnarğa äzerlänäçäklär, respublikadan cıyılğan yäş sälätle balalar da şunda yäşäp, Tatarstan xokkeyı danın arttırırğa äzerlänäçäklär.

Şulay itep, respublikada xokkeyğa iğtibar artqannan-arta bara. Aq barsnıñ canatarları da az tügel. Şunısı qızıq, xokkey çın irlärneñ uyını häm anı kübräk irlär yarat,dip sanalsa da, xäzer bu uyınnı häm bigräk tä uyınçılarnı yaratuçılar arasında güzäl zatlar arta başladı. Menä şularnıñ berse – Çulpan Zaripova belän bez bügen anıñ Aq barsqa häm xokkeyğa mönäsäbäte turında söyläşäbez.

Minen ike abıyım bar, şuña da min keçkenädän xokkey qarap üstem. Aq barsnıñ uyınnarın bik yaratıp qarap baram. Bigräk tä miña Danis zaripov, Aleksey Zinov’yevlar oşıy

Xäyer, Aq barsta kübräk tatar yegetläre uynasa, tağı da äybäträk bulır ide, di Çulpan. Anıñ fikerençä, respublikada xäzer üzebezneñ sportçılarnı äzerläw öçen dä şaqtıy eşlänä başladı. Läkin xäzergä respublikanıñ sport danın çittän kilgän sportçılar kütärä. Xäyer, tatarstanlılar alarnı çit itmi, üzläreneke itep qabul. Nişliseñ, älegä alarsız Rusiä çempionatında ciñülärgä ömetlänergä mömkin tügel. Menä bıyıl voleybol buyınça Rusiä berençelegendä şuşı könnärdä genä altın medal’lärne yawlağan Dinamo-Tattransgaz da bıltır cäyen komandağa şaqtıy ğına yoldızlarnı cälep itä aldı. Näticälär inde bu sezonda uq kürende – Tatarstannıñ voleybol komandası berençe urınnı aldı. Alarnıñ äle Aq barslılarnıñ kebek ük canatarları küp tügel. Xäyer, monısı inde tiz üzgärtelä torğan citeşsezlek. Ciñüçelärne yaratalar bezdä. Menä Dinamo-Tattransgaznı da ciñüdän soñ Qazannıñ hawa alanında orkestr, salyut, xätta xärbi bronetransporter belän qarşı aldılar.

Gölnaz İlgizär

XS
SM
MD
LG