Accessibility links

Кайнар хәбәр

İran häm AQŞ räsmiläre Bağdadta oçraşırğa mömkin


İran belän AQŞ räsmiläre Ğiraq iminlege turında söyläşer öçen Bağdadta oçraşırğa mömkin digän xäbärlär çıqqaç ta – İran şunda uq üz reakiäsen belderde. Tähran ni qadär saq bulırğa tırışsa da, räsmilär Waşington belän söyläşülärgä qızıqsınu belän qarıy. İranda 1979nçe yılğı İslam inqilabınnan birle ike il arasında diplomatik mönäsäbätlär yuq däräcädä ide.

AQŞ-İran söyläşüläreneñ köne äle bilgelänmägän. Ämma may başında Şärm-äş-Şäyxtä bulğan oçraşudan soñ, İran – kürşe Ğiraqqa yardäm itergä teläk belderde. Parlamentnıñ Milli İminlek häm Tışqı Säyäsät Komitetı başlığı Äläetdin Borujerdi, "İran belän AQŞ arasında Bağdadta ütäçäk söyläşülärneñ Ğiraq xalqı häm xökümätkä faydası bulaçaq häm alar Ğiraqtağı iminlek krizisına noqta quyaçaq" dip beldergän ide. Ul söyläşülärdä İrannı kem wäkillek itäsen Yuğarı Milli İminlek Şurası xäl itäçäk. Waşington yağınnan oçraşuda AQŞnıñ Bağdadtağı ilçese Ryan Crocker qatnaşaçaq.

İran äytüençä, bu söyläşülärne AQŞ täqdim itkän. Waşington, İrannıñ töbäktä täsire zur ikänen belä, di İran räsmiläre.

Bilgele ki, ägär dä yuğarı ruxi citäkçe Ayatolla Khameneidan röxsät bulmasa, İran belän AQŞ arasında söyläşülär turında süz dä çığa almas ide. İranda kön dä çıqqan konservativ "Kayhan" isemle basmanıñ baş möxarrire Hossäin Şariatmadari süzlärenä qarağanda, İrannıñ AQŞqa qarata säyäsäte üzgärmäde, anda fiker ayırmalıqları bik tirändä, tamırda yata, häm mönäsäbätlär barı tik kierenke bula ala, dip belderde.

Parlament prezidiumı äğzase Hossäin Nejabat isä, yomşağraq qaraşta tora. "Amerika İrannı Ğiraqta yardäm itergä sorağan ikän, häm bu üteneç eçkersez dip farazlıyq, ul oçraqta İran xezmättäşlek itäçäk." "Bu söyläşülär Ğiraq faydasına ütergä tieş" dide Nejabat.

Häm parlamenttağı azçılıq qına – berençe oçraşu Ğiraq turında bulsa – qalğannarı ike il arasındağı problemalarnı çişügä bağışlanır digän ömet belderde.

Deputat Heşmatulla Falahatpişe, söyläşülär bulu ixtimalı – ike il arasında qayber mäsälälärne çişep bulunı kürsätä, dide. Ägär dä İran qarşı yaqnıñ da yaxşı niäten kürsä – alğa taba uñay näticälär bulırğa mömkin, dide deputat.

Bälki oçraşunıñ näticäse dä bulmas. Alay da – monnan soñ İran-AQŞ söyläşüläre siräk küreneş buludan tuqtar, digän farazlar bar.

Alsu Qormaş
XS
SM
MD
LG