Accessibility links

Bügennän başlap Fransiädä yaña prezident - Nicolas Sarkozy


Xäbärlärdä äytelgänçä, çärşämbedä Parisnıñ Elizey sarayında 7 yılğa ber genä bula torğan tantana uzdı - xakimiätkä yaña prezident, soñğı saylawlarda ciñgän Nikolas Sarkozy kilde. Ant itü tantanasına qädär ul Fransiäneñ xäzer inde elekke prezidentı Jacques Chirac belän oçraştı, añardan ilneñ atom köçlären qullanu öçen maxsus kodlarnı aldı. Häm inde kiçen ük berençe çit il säfärenä dä çığıp kitte

Yaña prezidentnıñ ant kiterüe Fransiäneñ bar yuğarı elitası cıyılğan tantanada buldı. Xökümät äğzaları, xärbilärdän tış anda Nikolas Sarkozyneñ elekke häm xäzerge ğailäse dä qatnaştı.

Ciñügä saylawlarnıñ ikençe turında ğına ireşkän Sarkozy üzeneñ täwge prezident çığışında fransuz xalqın, saylawlar waqıtında nıq sizelgän säyäsi qarşılıqlarğa qaramastan xäzer üze tiräsenä tuplanırğa, fransuz cämğiäte nigezen täşkil itkän qimmätlärne nığıtırğa öndäde:

"Xezmätneñ, tırışlıqnıñ, izge eş qıluğa inanunıñ, xörmätneñ qimmäten yañartu kiräk, çönki näq menä şul qimmätlär adäm zatınıñ däräcäse, abruyı nigezen täşkil itä häm sotsial täräqqiätneñ şartı bulıp tora. Ä inde tüzemsezlek, rasaçılıq, anti-semitizm, dini doşmanlıq kiresençä härwaqıt cimergeç bula", di Fransiäneñ yaña prezidentı Sarkozy.

Şuşı yaña urınında prezident, aña fransuz xalqı kürsätkän ışanıçnı aqlarğa häm wazifaların namuslı ütärgä wäğdä itä.

"Xalıq miña ışanıç kürsätte, häm min monı noqtasına qädär ütäp, Fransiäneñ bäysezlegen, Fransiäneñ üzençälegen yaqlayaçaqmın, däwlät abruyın, bigräk tä anıñ tarafsızlığın xörmät itäçäkmen", di Nikolas Sarkozy.

Prezidentlığınıñ täwge könendä ük anı şaqtıy mäşğül programma kötä ide, çärşämbe kiçen ük Sarkozy üzeneñ berençe säfärenä çığıp kitte. Berlingä kilep ul xäzer Yewropa Berlegendä räislek itkän Germaniäneñ kanslerı Angela Merkel belän oçraşa. Sarkozyneñ Fransiä prezidentı buluı Parisnıñ urtaq Yewropa tözü qaraşlarına küpmeder üzgäreşlär alıp kilä häm anıñ monı Merkelgä şunda uq citkerü mömkinlege bulaçaq.

Merkel üze Yewropa Berlege isemennän atna azağında Rusiägä bara häm anda anı Putin belän qatlawlı söyläşülär kötä.

Ä inde Fransiä prezidentınıñ il eçendäge eşlärenä kilgändä, şularnıñ iñ möhime - yaña xökümät qoru mäs''äläsendä xäbärlär comğağa qädär kötelmi.

Kärim Kamal
XS
SM
MD
LG