Şağir Zölfät belän xuşlaşu S.Säydäş isemendäge Zur konsertlar zalında irtänge säğät 11 başlandı. Ämma şağirlär, ädäbiät söyuçelär ike säğät aldan uq Zölfätne cäsadı kiterelä torğan urınğa cıyıla başladı. Şağirneñ cämğiättä totqan urını, real' däräçäse şundıy waqıtlarda açıqlana. Xalıqnıñ häm xakimiätneñ Zölfätneñ istälegenä citdi häm uñay mönäsäbäte kürende.
Zölfätneñ wafatı uñayınnan Tatarstan prezidentı Mintimer Şäymiev, Xökümät häm Däwlät Sovetı isemennän möräcäğät basılıp çıqtı. Mätem yolası räsmi häm ixlas oyıştırıldı.
Mätem cıyılışın premyer ministr urınbasarı, mädäniät ministrı Zilä Wälieva açtı.
Respublika citäkçelege isemennän Tatarstan premyer ministrı Röstäm Minnixanov çığış yasadı. Ul Zölfätneñ isemen mäñgeläşterü, şiğri idealların ğämälgä quyu öçen kiräkle bulğan barlıq eşlärne başqarırğa kiräkle turında äytte, şağirneñ ğailäsenä, icatın xalıqqa citkerüdä yärdäm tiergä wäğdä birde.
Mätem cıyılışında yazuçılar berlege räise İlfaq İbrahimov, Zölfät belän 25 yıl buyı bergä eşlägän “Çayan” jurnalınıñ baş möxärrire Räşit Zäkiov, şağirlär Rädif Ğataş, Robert Miñnullin çığış yasadılar.
Robert Miñnullin: Zölfät şiğriätkä yäşen kebek yäşnäp kilep kerde. Häm ğömer buyı şundıy bulıp qaldı. Tufan belän S.Xäkimneñ yaratqan enekäşe ide. Uquçılarnıñ yaratqan şağire, qälämdäşläreneñ yaratqan dustı ide. Ul üze dä yarata belä ide: Tuğan yağı Möslimne, tuğan xalqın, tuğan telen yarattı.
Şağir Zölfät tatar xalqınıñ soñğı yıllardağı milli tereleşen aldan kürsätkän, bu yañarışnı yaqınaytqan keşe. 60 yäşe tulğanda da anı xalıq yäş, romantik, talantlı şağir bularaq qabul itte, ul aqsaqalğa tügel, ä buldıqlı tatar yegetenä, awıldağı Sabantuy batırına oxşağan ide. Ul Tatarstan respublikasınıñ qabatlanmas ber bilgese. Zölfät digän isemne xalqıbız yaxşı belä. Zölfätneñ şiğerlären uqı. Zölfätneñ kitapları tiz tarala, alarnı kibettä tabıp bulmıy. Dimäk anıñ icatı Tuqay, Taqtaş, Xäsän Tufan, Sibgat' Xäkim äsärläre kebek bezneñ küñellärdä mäñge yäşäyäçäk, didelär xuşlaşırğa kilüçelär. Tik barıber yuğaltu qayğısı zur, Zölfätneñ yuqlığına berkem dä ışana almıy. Şağir Zölfät Yaña Bistädäge möselman ziratına cirlände.
Elmira Gazizova
