Accessibility links

якшәмбе, 4 декабрь 2016, Казан вакыты 02:48

Pravoslav çirkäwläre berläşte


80 yıl elek Rusiädä üktäber inqilabı waqıtında çit ilgä kitkän rus möxacirläre oyıştırğan çirkäw belän Rus pravoslav çirkäwläre – berläşte. Bügen Mäskäwdä moña bağışlanğan qupşı tantana uzdı.

İke çirkäwneñ berläşüe Mäskäwdä Qotqaruçı Ğäysä ğibädätxanädä – xristian kalendarendä ğäysä päyğämbärneñ kükkä kütärelgän könne doğalar cırlanıp bilgelände. Rusiäneñ pravoslav çirkäwe belän bolşeviklardan qaçqan xristiannar arasındağı tarqalışqa räsmi töstä noqta quyıldı. Çirkäw qanunnarı turındağı kileşügä Rusiä pravoslav çirkäwe başlığı Mäskäw Patriarxı Aleksy İİ häm New Yorkta urnaşqan pravoslav çirkäwe başlığı Metropolit Lavr qul quydı.

30ğa yaqın ildä barlığı yartı milionnan artıq keşe üzlären New Yorktağı çirkäw wäkile itep sanıy. Metropolit Lavrğa, alarğa – Rusiädäge pravoslav çirkäw belän berläşü kiräklegen añlatu öçen baytaq tırışlıq kiräk bulğan. Bügen çığış yasağanda, Lavr, çirkäwneñ berläşü ähämiäten menä niçek añlattı.

"Bergä cıyılunıñ bu möbäräk könneñ izge säğatendä min Rusiä pravoslav çirkäweneñ ike öleşeneñ kiläçäktä berlekne tiränäytep allağa häm rus xalqına bergä xezmät itülären telim."

4 yıl elek Mäskäw Patriarxı Aleksy, 1927nçe yılda imzalanğan, çirkäwneñ ateist sovet rejimına tuğrılıqlı buluı turındağı belderüdän räsmi töstä baş tartqan ide. Bügenge berläşüne Alexy – ütkänneñ boğawlarınnan qotılu, dip bäyäläde:

"Çirkäwlärebezneñ berläşüendä ciñdek. İnqilap, watandaşlar suğışı näticäläre häm cämğiättäge tarqalışnı yırıp çıqtıq. Çirkäw üsä häm watanıbız yañadan torğızıla."

Tantanada qatnaşqan Rusiä prezidentı Vladimir Putin çirkäwlärneñ berläşüe – rus xalqınıñ berdämlegen torğızuda möhim adım, dide:

"Çirkäwlärneñ berläşüe turındağı kileşüneñ imzalanuı – rus pravoslav çirkäwläreneñ genä berläşüen añlatmıy. Bu – zur ähläqi mäğnägä iä bulğan milli häm tarixi waqiğa."

Bügen imzalanğan kileşüdän soñ – çit ildäge pravoslav çirkäwe – Rusiä çirkäwenä tulısınça buysınaçağın iğlan itte.

Alsu Qormaş
XS
SM
MD
LG