Accessibility links

якшәмбе, 11 декабрь 2016, Казан вакыты 09:02

Tatarstan deputatları Qazaqstanda bulıp qayttı


Tatarstan soñğı arada çit illär belän elemtälären nığıta. Törle yaqlı xezmättäşlek östendä respublika xökümäte wäkilläre dä, sänäğät tarmağı da, eşquarlar da tırışa. Tatarstan parlamentı wäkilläre dä qalışmıy. Küptän tügel genä Däwlät Şurası räise Färit Möxämmätşin citäkçelegendäge törkem Qazaqstannan qayttı. 17 mayda säfärneñ näticäläre, üzläreneñ tä’sirläre belän Qazaqstanda bulğan deputatlar jurnalistlar belän dä büleşte.

Jurnalistlar belän oçraşu räsmi säfärneñ qayber mizgellären taswirlağan videotasma kürsätüdän başlanıp kitte. Anı qarağanda şul açıqlandı, Tatarstan wäkillärenä Qazaqstannıñ başqalası bik oşağan ikän. Ul şundıy zamança, matur şähär, qazaqstanlılar bezgä kilgäç, Qazan öçen beraz caysızraq ta bulır inde bezgä, dip uftandılar oçraşuğa kilgän Rimma Ratnikova häm Räzil Wäliev. Ğomumän, räsmi säfärneñ barışı, anıñ näticäläre belän dä qänäğät qalğan tatarstanlılar. Üzläreneñ tä’sirläre belän urtaqlaşqanda deputat Räzil Wäliev menä nindi üzençäleklärne iskä aldı.

Qazaqstan bit ul ayırım däwlät, däwlätle xalıq bötenläy başqaçaraq xis itä inde üzen. İkençedän, monda il belän citäkçelek bik aqıllı oyıştırılğan. Citmäsä, alarnıñ qazılma baylıqları da bik küp. Minemçä, Qazaqstannıñ kiläçäge bik zur

Färit Möxämmätşin citäkçelegendäge respublika parlamentı wäkillären Qazaqstannıñ yuğarı parlamentı Senat häm tübän pulatı – Mäcles eşe belän tanıştırğannar, anda qızıqlı oçraşular da uzğan. Tatarstan deputatları fikerençä, qazax kollegalarınnan alarğa öyränerlek närsälär bar.

Bilgele bulğança, Qazaqstanda tatar tarixına bäyle cirlär baytaq, bezneñ xalıqlar, alarnıñ telläre dä bik yaqın. Şuña da, ike arada humanitar, icadi xezmättäşlekne ayıruça arttırırğa kiräklege turında süz barğan Qazaqstanda. Andağı bezneñ millättäşlärebez dä iskä alınğan. Astanadan qaytqan deputatlar süzlärenä qarağanda, andağı tatarlar öçen xäzer şartlar tudırıla başlağan. İlneñ 14 töbägendä tatar ictimaği berläşmäläre eşläp kilä, 3 tatar deputatı da saylanğan ikän. Alay da, elekkege 300dän artıq millättäşebezdän xäzerge köndä Qazaqstanda 250 meñ genä keşe yäşäp yata.

Tatarstan parlamentı wäkilläre Qazaqstanda çağında älege il öçen bik möhim ber waqiğa da buldı. Prezident Nursoltan Nazarbaev ilneñ parlamentına östämä wäkälätlärne tapşıru turındağı täqdim yasadı. Bu Qazaqstannıñ demokratiä yulınnan tağın ber adım yasawı, dip bäyäläde monı Däwlät Şurası räise urınbasarı Rimma Ratnikova.

Qazaqstan belän Tatarstan arasındağı xezmättäşlek iqtisat ölkäsendä dä bulaçaq, älbättä. Ayıruça qazaqstanlılarnı KamAZ, boralaqlar berläşmäse qızıqsındıra ikän. Älege yünäleştäge elemtälär dä iğtibar üzägendä toraçaq Tatarstanda.

Gölnaz İlgizär

XS
SM
MD
LG