Accessibility links

шимбә, 10 декабрь 2016, Казан вакыты 15:51

Omski ölkäseneñ Tara şähärendäge “Yaqtaş” klubı eşläre


Omski ölkäseneñ Tara şähärendä “Balalar icat üzäge” eşli. Anıñ qarşındağı tügäräklärdä, klublarda törle törle millät balaları şöğellänä. Älege üzäk qarşında “Yaqtaş” isemle tatar balaları klubı da eşli. “Üzäktä balalar tuğan tellären, milli mädäniätlären häm üz xalıqlarınıñ ğöref-gädätlären öyränälär”,- di üzäk direktorı Lyudmila Wandışeva .

Uzğan çärşämbedä uqu yılı tämamlanu uñayınnan “ Yaqtaş” klubında tatar tele buyınça açıq däres ütkärelde. Däresne Tatar mädäniät üzäge metodistı İl'dar Mamatov alıp bardı. Däreskä “Balalar icat üzäge” xezmätkärläre, Tatar mädäniät üzäge aktivistları häm ata-analar da kilgän idelär. Däres barışında balalarnıñ öylärendä yazıp kilgän inşaları tikşerelde. Annan tış därestä balalar “Yaqtaş” klubı citäkçese Älfirä Deket häm tatar üzäge aktivistı Çinnan xanım citäkçelegendä äzerlängän “Altın almalar” äkiäten kürsättelär.

“Yaqtaş” klubında şöğellänüçe balalar şimbä könne rayon klubında Tara şähäreneñ “Nur”, Olı Uış awılınıñ “Rozalina” häm “Duslıq” kollektivları köçe belän oyıştırılğan kümäk konsertta da qatnaştılar. Anda alar cırlı-iyülle küreneş belän çığış yasadılar. Äytergä kiräk, “Yaqtaş” klubında balalar ikençe yıl ğına şöğellänälär. Alarnıñ ölkännär oyıştırğan konsertlarda yasağan çıyışları da, açıq därestä kürsätkän belemnäre dä, klubqa yöri başlağan könnär belän çağıştırğanda, tuğan tellären, tatar cırların-iyüllären yaxşı ğına öyränülären, tamaşaçılar aldında üzlären ışanıçlı tota aluların kürsätte. Däreskä kilgän äti-änilär uqıtuçılardan kiläse yılnı da “Yaqtaş” klubınıñ eşen däwam itülären soradılar.

Saniä Mirxaleeva, Omski

XS
SM
MD
LG