Accessibility links

җомга, 9 декабрь 2016, Казан вакыты 22:26

Libanda atışlar tuqtalmıy


Sişämbe könne töştän soñ Libandağı suğışçan Fatah äl-İslam törkeme xökümät ğäskärläre belän bäreleşlärne tuqtatuın iğlan itkän ide. Ämma küp tä ütmästän atışlar yañadan qabınıp kitte.. 3 kön elek başlanğan bu bäreleşlärdä kimendä 81 keşe hälak buldı. Ilneñ tönyağında Tripoli şähäre yanında Nahr äl-Bared fälestin qaçaqlar lagerına sıyınğan ekstremistlar belän atışlarda bügen tanklar häm artilleriä dä qatnaştı. Başqala Bäyrütneñ sönni öleşendä şartlaw 6 keşene yaraladı.

Küp kenä ğadi Libanlılar soñğı könnärdägeä bu qan qoyu küp ğazaplar kiçergän il öçen çirattağı ber faciğä di. Şundıylarnıñ berse bügen Bäyrüttä Reuters xäbär agentlığına "Bu xällär ber faciğä. Il citäkçeläre fiker ayırmalıqların çitkä quyıp ildä barğan xällärne kürergä tieş. Xökümätne häm ilne berläşterep anıñ öçen iñ yaxşısın tabarğa kiräk" dide.

Atışlar yäkşämbe könne iminlek köçläre Tripolida bank talawda şiklänelgän suğışçılarnı ezläp tentü ütkärgännän soñ başlandı. Suğışçılar Fätah äl-Islam dip atalğan sönni törkem äğzaları.

Uzğan cäydä Izrail belän bulğan qatı bäreleşlärdän Liban zur zıyan kürgän ide. Xäzerge atışlar isä 17 yıl elek tämamlanğanğan watandaşlar suğışınnan soñğı iñ qanlı bäreleşlär. Häm bu xällär bar dönyada borçılu uyata.

BMO general sekretare Bank Ki Munnıñ süzçese Michele Montas düşämbe könne xäbärçelärgä borçılu belderde.

"BMO general sekretare Fatah äl-Islam suğışçıları belän Liban armiäse arasındağı bu atışlarğa tirän borçıla. Fatah äl-Islamnıñ ğämälläre Libannıñ totrıqlılığına häm suverenlığına höcüm. General sekretar Libandağı fälestin törkemnäreneñ Liban armiäsenä qarşı bu höcümnärne berdäm räwetşä xökem itüen xuplıy. Ul barlıq taraflarnı ğäyepsez tınıç xalıqnı yaqlaw öçen mömkin bulğança tırışırğa çaqıra" dide Montas.

Libannıñ iqtisad häm säwdä ministrı Sami Häddad BBCğa xökümät bu höcümnär artında Süriä tora dip isäpli dide.

Yäkşämbe könne Tripolida başqa ber ministr Äxmät Fatfat bu bäreleşlärne BMOnıñ 2005-nçe yılda elekke premyer ministr Räfiq Xäririne üterüçelärne xalıqara xökümgä tartu tırışlığana qarşı çığu belän bäylägän ide.

BMOdağı Süriä ilçese Bäşär Cäğfäri mondıy ğäyepläwlärne kire qağıp Süriäneñ Fatah äl-Islam belän bäyläneşläre yuq dide. Ul şulay uq bu oyışmanıñ qayber äğzalarınıñ äl-Qaidäne yaqlawda ğäyeplänep Süriädä törmägä yabılğan buluın da telgä aldı.

"Fatah äl-Islam citäkçeläre süriälelär tügel. Häm alar, äytüemçä, äl-Qaidä äğzası bulğan öçen Süriä törmäsendä berniçä yıl utırdı. Şuña kürä bu törkemneñ xäzerge eşlärenä Süriäneñ bernindi qatnaşı da bula almıy. Ägär alar Süriägä kiläsälär törmägä yabılaçaqlar" dide Cäğfäri.

Cäğfäri şulay uq ul suğışçılarnıñ küpçelegeneñ fälestinle buluına da basım yasadı.

Libandağı barlıq fälestin törkemnäre dä Fatah äl-Islamnı xökem itep çıqtı. Süriäne yaqlawçı Xizbulla da üzeneñ bu törkemnän ayırım buluın belderde.

Libanda 400 meñläp fälestin qaçağı yäşi. Alarnıñ küpçelege 1948 yılda Izrail däwläte tözelgännän soñ öylären taşlap kitärgä mäcbür buldı.
XS
SM
MD
LG