Accessibility links

шимбә, 10 декабрь 2016, Казан вакыты 10:11

Omski ölkäseneñ Tara şähärendä cır bäyräme uzdı


Tara şähäreneñ “Tönyaq” dip isemlängän mädäniät häm yal üzägendä uzğan şimbädä cır bäyrämenä äylängän zur konsert-kiçä bulıp uzdı. “Moñnar qaytsın awılğa” dip isemlängän konsert programması Taranıñ “Nur” häm “Yaqtaş”, Olı Uış awılınıñ “Duslıq” häm “Ruzalina” kollektivları köçe belän äzerlängän ide. “Mondıy qatnaş konsert oyıştıruıbıznıñ maqsatı - ber yaqtan xalıqqa milli moñnarıbıznı-cırlarıbıznı citkerü häm yäş buında milli mädäniätkä qızıqsınu uyatu bulsa, ikençe yaqtan rayonda eşläwçe tatar kollektivlarnıñ ireşkän unışların kürsätü dä”, - di tatar mädäniät üzäge citäkçese Rauşaniä Kurmanova.

Säxnäneñ bizäleşenä ayırım tuqtalırğa kiräk. Ul tatar öe räweşendä bizälgän ide. Artqı planğa zur alsu çigüle şäl elenep quyılğan, urtada borınğı sandıq, anıñ östendä garmun, samovar quyılğan täbänäk östäl, qırıylarda öslärenä qorama cäymälär yabılğan eskämiälär, idändä palas, ike yaqta milli bizäkle sölgelär, “Bolar barsı da kiçäbezneñ töp mäğnäsen – awıllarıbızğa tatar moñnarınıñ qaytırğa tieşlegen tamaşaçığa citkergänder dip ömetlänäbez”, - di Ruşaniä Kurmanova

Yäşeren tügel, Omski yağında ğına tügel, Rusiäneñ küp töbäklärendä xäzer ğailälärdä tatar telendä aralaşu yuq däräcädä. Balalar ğına tügel, ata-analar da tuğan telebezne naçar belälär. “Bezneñ maqsatıbız - yäş buında tuğan telebezgä qızıqsınu uyatu, milli xis tärbiäläw. Monıñ öçen bez alarnı keçkenädän ük tatar konsertlarına, törle tügäräklärgä cälep itärgä tırışabız”, - di tatar mädäniät üzäge metodistı İl'dar Mämätov.

Äytergä kiräk, balalarnı tatar sänğätenä cälep itü Tarada inde berniqädär cayğa salına başlandı. İke yıl elek “Yaqtaş” klubı tözelep, eşläp kitte, tatar üzäge qarşında tatar tele fakul'tativı açıldı, tatar üzäge aktivistları köçe belän balalar öçen ayırım kiçälär oyıştırıla, balalar tatar üzäge oyıştırğan konsertlarda häm başqa çaralarda qatnaşalar. Şimbä könne ütkän konsertta da “Yaqtaş” klubı balaları qatnaştı. Alar “Nur” ansamble belän bergä “Aulaq öy” küreneşen uynadılar, “täñkä salu”, “qayış” uyınnarında qatnaştılar, yarış räweşendä oyıştırılğan cırlı–iyülle küreneşlärdä ostalıqların kürsättelär.

Konsert programması xalqıbıznıñ borınğı cırlarına da, estrada cırlarınnan tözelgän ide. Färidä xanım Kurmanovanıñ “Saq-Soq” bäyeten başqaruı, Wägiz äfände Sadıykovnıñ osta itep garmunda uynawı, Väliä Fäxretdinovanıñ, Gölnara Avazovanıñ, Zäkiä Surlonıñ häm Gölnur Raxmangulovanıñ matur itep tatar xalıq cırların başqaruları ber genä tamaşaçını da bitaraf qaldırğandır. Yäş cırçılarnıñ: Älmira Ğaynullina, Färit Bäşirov, Nadiä Yonıysova, “Ruzalina” ansamble qızlarınıñ çığışları kiçäneñ kürkäm ber bizäge buldı disäk , yalğış bulmas.Kiçä-konserttan qatnaşuçılar da, tamaşaçılar da qänäğät qaldılar, Barsı da “Andıy oçraşular yışraq bulsın ide”,- digän teläklären belderdelär.

Menä şundıy üzençälekle kürkäm cır bäyräme bulıp uzdı Tara şähärendä. Çara oyıştıruğa küp köç quyğan Tara şähäre häm Olı Uış awılı kollektivlarına tuqtalıp, beraz yal itep alırğa da mömkin bulır ide. Ämma, alda eşlär bixisap. Alarnı balalarnı yaqlaw köne, şähär häm awıl bäyrämnäre, cäyge konsertlar häm iñ möhime - Işıqlar awılında ütäçäk rayon Sabantuyı kötä.

Saniä Mirxaleeva, Omski

XS
SM
MD
LG