Accessibility links

дүшәмбе, 5 декабрь 2016, Казан вакыты 15:40

Çallıda TİÜ bäygese uzdı


Çallı TİÜe uzğan yıl "Tuğan yağım - Tatarstan" digän temağa inşa yazu buyınça bäyge iğlan itkän ide. Bäygegä bıyılnıñ mart ayında yomğaq yasalıp, ciñüçelär iğlan itelergä tieş bulsa da, aqça qıtlığı arqasında İctimaği Üzäk näticä yasawnı may ayına qaldırdı. Menä, yäkşämbe könne şuşı bäygedä ciñüçelär İctimaği Üzäkneñ ştab-kvartirasına kildelär häm alarğa aqçalata büläk birelde. Uquçılarğa inşa yazarğa yärdäm itkän mösällimnärgä qimmätle büläklär tapşırıldı. Bäygeneñ maqsatı tübändägedän ğibrätle:

- Mäktäp uquçıları arasında tuğan yaqqa mäxäbbät xisläre uyatu, Watan tarixın häm mädäniäten öyränergä etärgeç birü. Bıyılğı çarada Çallı şähärläre, Tuqay häm Minzälä rayonnarınnan 33 bala qatnaşqan. Ciñüçelär 3 törkem buyınça bilgelängän. Berençe törkemdä berençe urın Tuqay rayonı, Kenäz awılı uquçısı R.Şäyxetdinovağa. İkençe törkemdä Minzälä rayonı Bikbaw mäktäbennän N.Usmanovqa, 3-dä Çallınıñ Ğali Aqış isemendäge mäktäptän L.Möxämmätxanovağa birelä. Alarnıñ härqaysına meñ sum aqça tapşırıldı. 2 nçe urınnı aluçılarğa - 700, 3 nçe urındağılarğa 500 sum birelde. Bıyılğı bäyge närsäse belän üzençälekle? Çallı TİÜe räise R.Kaşapov häm jyuri äğzası Saniä Sabitova:

- Bu yulı Minzälä rayonı uquçıları qatnaştı. Şunıñ belän region zuraydı. Kiläçäktä Başqortstan häm Udmurtiädä tatar yäşägän töbäklärgä dä çığarğa uylıybız. Bıyılğı bäygedä balalar uzğan yıl belän çağıştırğanda kübräk buldı.

Jyuri äğzası Saniä Sabitova:

- Bıyılğı inşalarnıñ eçtälege köçle. Balalar tarixnı äybät öyrängän. Alar kiläçäktä Tatarstannıñ danın yıraqlarğa cibärü turında xıyallanalar. Ä xäzer inde qayber ciñüçelärne häm alarnıñ mösällimnären işetik. Minzälä rayonı Bikbaw awılınnan 8нче sıynıf uquçısı Niäz üz törkemendä berençe urınnı aldı. Älege bäygegä anı uqıtuçısı Ence Usmanova äzerlägän.

- Bik küp uqırğa turı kilde. Ayıruça 11 nçe sıynıf öçen yazılğan "Tatarstan tarixın" öyrändem. Gazeta - jurnallarnı küp uqıdım.

Ciñüçelärgä büläklär tapşırğan waqıtta TİÜ räise R.Kaşapov, räis urınbasarı Gabdraxman Cäläletdinov: "Balalar borınğı babaları xaqında döreslekne belergä tieşlär. Xäzerge şartlarda bu ayıruça möhim."- digän fiker äyttelär. İctimaği Üzäk xäzer 10 nçı bäyge ütkärü xaqında iğlan äzerli.

Ğafiulla Ğaziz, Çallı

XS
SM
MD
LG