Accessibility links

сишәмбе, 6 декабрь 2016, Казан вакыты 17:08

Başqortstanğa bar Rusiä mariları cıyıldı


Başqortstan bu könnärdä mari xalqınıñ ruxi mäkkäsenä äwerelde. Respublikanıñ Böre şähärendä mari milläte wäkilläreneñ zur cıyını başlanıp kitte. Ul Rusiä marilarınıñ berençe qorıltayına 90 yıl tuluğa bağışlana. Şuşı uñaydan bäyräm tantanalarına 400 dän kübräk keşe kilde. Mari El' respublikasınnan da 140 delegat çaqırılğan. Alar arasında tarixçı ğalimnär dä, etnograflar, milli häm millätara säyäsät belgeçläre, däwlät häm cämäğät eşlekleläre, sänğät ostaları da bar. Mari El' wäkillegen şuşı respublika Xökümäte räise urınbasarı, Mädäniät häm milli säyäsät ministrı Mixail Wasyutin citäkli.

Töp çaralar Böre şähärendäge sotsial'-pedagogiä akademiäsendä fänni-ğamäli konferensiä belän başlandı. “Başqortstan häm Mari El':tarixi täcribä häm xezmättäşlek perspektivaları” dip atalğan cıyında başqort ğalimnäre häm räsmi xakimiät wäkilläre dä qatnaşa. Anda Başqortstan mäğärif ministrı urınbasarı Artur Surin da çığış yasadı häm başqort belän mari xalıqlarınıñ ğasırlardan kilgän duslığı turında mäğlümatlar birde. Annan soñ Mari El'dan kilgän ğalimnär dä üzläreneñ tirän eçtäşlekle dokladların täqdim itte.

Marilarnıñ berençe qorıltayına 90 yıl tuluğa bağışlanğan çaralar şimbä könne dä däwam itäçäk. Qunaqlar Başqortstanda marilar tuplanıp yäşäwçe Mişkä, Krasnokama häm Qaltası rayonnarında da bulaçaq häm andağı bixisap oçraşularda, mädäni çaralarda qatnaşaçaq.

XS
SM
MD
LG