Mädäniät ministrlıygında uzğan tügäräk östäl Stalker kinofestivale qısalarında ütkärelde. Şunlıqtan süz başlağançı oyıştıruçı yaq, yäğni Qazannıñ keşe xoquqların yaqlaw xezmäte citäkçese Şoloxov İğor häm Rusiä kinorejisserları gildie citäkçese İgor' Stepanov utırışqa cıyılğannarğa berniçä fil'mnan özek täqdim ittelär.
Älege tawışlar Mäskäw vokzalında yörüçe bala-çağadan yazdırılıp alınğan. Oyıştıruçılar äytüençä bu özekne kürsätep alar alğa taba söyläşüne şul yassılıqta däwam ittermäkçe bulalar. Şuña da äñgämä başlanğançı uq alar, kilgän keşelärgä ğädättägeçä ozın-ozın dokladlar yasamasqa kiñäş ittelär.
Älege äñgämädä töp rol’lärdä Tatarstannıñ narkotiklar äyläneşen tikşerü idäräse wäkile Mansurov Stanislav, Tatarstan ministrlar kabinetında narkotiklarğa qarşı eş alıp baruçı bülek citäkçese Roza Sadıykova, “Narkotiksız şähär”, “Vera” oyışması wäkilläre, Qazan däwlät meditsina universitetı ğalimnäre, häm başqalar qatnaştı.
Baştan uq oyıştıruçılar qarşı yaqqa tögäl sorawlar yudırdı. Beraz waqıt tınıç qına söylägännän soñ, cawap totuçılar sorawlarnı üzlärenä höcüm bularaq qabul itep bik xafalana başladı. Oyıştıruçılar küpme genä dä tögäl faktlar tartıp çığarırğa tırışsalar da, cawapqa haman ğomumi süz işetergä turı kilde.
Tügäräk östäldä qatnaşuçılar san östenä san, ardırğıç bertösle söylämne tıñlap tämam yoqlap kitergä äzer ide. “Preodolenie” reabilitatsion üzäк xezmätkäre, üze dä moña qädär narkotik qullanıp qarağan Gerasimov Aleksandr, tügäräk östälne beraz oçlatıp, beraz ğına xalıqqa yaqın, tormışçan xällärgä tuqtaldı.
Yäşlärgä yuq disäñ alar anı barıdır eşläp qarayaçaqlar. Xäzer bezneñ üzäkkä 15 yäştän alıp yäşsmerlär kilä. Narkotik belän qullanu qayan kilä. Bügen ğailädä cılılıq yuq, balağa iğtibar citmi. Ata – analar barı ber maqsat belän yäşi, qayan aqça tabırğa, aşatırğa, kienderergä, uqırğa kertergä, balanıñ ruxi tärbiäse onıtıla, ul qaya barırğa belmi. Tozlı qıyar berqayçan da yaña üskän qıyar bula almıy disälär dä, Narkomannarnı däwalap bula. Bügen bezneñ üzäktä 40 keşe däwalana, täcribä kürsätkänçä, bezdä buluçılarnıñ 30 protsentı başqa narkotiklar qullanmıy.Berär säğät waqıt uzğannan soñ, tügäräk östäldä qatnaşuçılarnıñ qayberläre şulqädär ardı ki, xätta mondıy fikerlär işetergä turı kilde.
Tatarstan ministrlar kabinetında narkotiklarğa qarşı eş alıp baruçı bülek citäkçese Roza Sadıykova söyli.
Bez monda inde ber säğät sezneñ yuq-bar sorawlarığızğa xisap totabız. Ä respublikada narkotiklarğa qarşı köräş ölkäsendä ni eşlänä, beläsezme, yuq, ä bit küp äyber eşlängän. Häm bu mäğlümat härkemgä açıq. Sezgä üz sorawlarığızda bilgele ber yassılıq saylarğa ide. Alaysa bu utırışnıñ mäğnäse kürenmi.Narkotiklarğa qarşı köräşüçe räsmi oyışma wäkilläreneñ tügäräk östäldän qalğan tä'sirläre şundıy ide. Ä narkomaniägä qarşı eşlängän häm biredä täqdim itelgän fil'mnar alar tarafınnan ütä dä tiskäre qabul itelde.
Ğädel Galämetdinov.
