Accessibility links

сишәмбе, 6 декабрь 2016, Казан вакыты 17:17

Çallılar räsmi bäyrämgä bitaraf


Monnan 7-8 yıl elek kenä çik saqçıları üzläreneñ bäyrämnärenä meñärläp cıyılalar ide. Xakimiät çik saqçıları bäyrämen üz qullarına alıp, räsmi tös kertkännän soñ, kilüçelär sanı kimegännän kimede. Bıyıl memorialğa 200 läp keşe kilgänder. Berençe tapqır bularaq, 28 nçe may bäyräme Çallı häm Tuqay rayonnarında yäşäwçe elekke çik saqçıları qatnaşında ütte. Elekke çik saqlawçılarınıñ kübese yılğa buyında, şähär parklarında, Sabantuy mäydanında üzbuylı yörüne xup kürgännär. Xakimiät ütkärgän bäyräm könendä säyäsi çığışlar da buldı. "Yedinaya Rossiä"neñ Çallıdağı säyäsi Şurası isemennän çığış yasağan Mayorov äfände, Rusiäne bik küplär xälsez, taralğan il bularaq küräseläre kilüen, şular arasında Amerikanıñ buluın da assızıqladı.

Şähär veterannar şurası räise N.Safin: "Elekke zamannarda bezneñ ilebezneñ çikläre nıqlı yozaqta ide. Xäzer ul ütä kürenmäle",-dide. Baş xärbi komissar polkovnik İl'sov, Rusiä bulğanda, çik buyı ğäskärläre bulaçaq dip, bäyrämdä qatnaşuçılarnı söyenderde. Şulay da, cıyılğan xalıq arasınnan beräw, bälki kiresençäder, dip sörän saldı. Kiresençäse, çik buyı ğäskärläre bulğanda, Rusiä bulaçaq, digänne añlata. Ä xäzer elekke çik saqçıları bulğan tatar yegetläre fikerläre - Nail Galimov – 1970 nçe yıllarda Qıtay çigendä xezmät itkän, xäzerge waqıtta dotsent:

- Min 1969-1970 nçe yıllarda Yıraq Könçığışta tatar yegetläreneñ küpläp xezmät itüenä äle dä ğäcäplänäm.

Ramil Zinnurov. İnvestitsiä şirkätendä baş belgeç:

- Çik buyında xezmät itü matur istäleklär genä qaldırdı. Ğorurlıq xise bar. Menä şul xisne xäzerge buınğa da biräse ide.

Çik buyı saqçıları, veterannar, cıyınnan soñ Äfganistanda häläk buluçılar memorialına barıp, çäçäklär saldılar. Alarnıñ bäyräme, ğädättägeçä, qarañğı töşkänçe däwam itäçäk. Arıtk zur ğauğa bulmağanğa, Çallı militsiäse dä yäşel furajkalılarğa älläni bäylänmi.

Ğafiulla Ğaziz, Çallı

XS
SM
MD
LG