Accessibility links

җомга, 9 декабрь 2016, Казан вакыты 10:49

Restoran totu qayda da ber: AQŞta eşmäkär xatın-qızlar cıyıldı


May ayında tärräqi itüçe 20 ildän kilgän 32 xatın-qız AQŞtağı xatın-qızlarnıñ eşmäkärlek täcribäse belän tanıştı. 3 atnalıq bu çara "Fortune" isemle biznes jurnalı häm AQŞ däwlät departamentı yardämendä oyıştırılğan ide. Qatnaşuçılar äytüenä qarağanda, Quşma Ştatlarda eşquarlıq, söyläşülär alıp baru täcribäse, köndäşlek itä belü kebek sıyfatlar – Yevropa illärennän küpkä yuğarıraq.

Yunna Rezaeva – Rusiäneñ Yıraq Könçığışınnan kilgän eşmäkär xanım. Anıñ berniçä restoranı, ipi peşerü urınnarı, sänğat galereyaları häm suvenirlar satuçı kibetläre bar. Anıñ Vladivostoktağı "Nostalgia" isemle restoranı 2000 yılda Rusiädäge iñ yaxşı restorannarğa birelä torğan "Altın Torna" bülägen alğan.

AQŞta uzğan cıyınğa Yunna xanım – ikmäk häm qamır äyberläre peşerü eşen yaxşıraq öyränü, tawarnı satu, yaña cihazlar alu häm yaña reseptlar tabu maqsatı belän kilgän. Yunna Rezaevağa, dönyanıñ iñ zur şirkät citäkçeläre belän oçraşu häm kiñäşläşüdän tış - yaña keşelär belän tanışu häm yaña kontaktlar buldıru faydalı bulğan. Restorannarğa kilgändä, aşxanä totu eşe – Rusiädä häm Amerikada yaqınça ber törle, di Yunna:

"Min üzemneñ restorannı yaxşı restoran dip sanıym, häm anı monda, Amerikadağı yaxşı restorannar belän çağıştıram. İñ berençe – yaxşı restoranda aşlar tämle bulırğa tieş, annarı – yuğarı däräcädä xezmät kürsätü – häm räxät bulırğa tieş."

Restorannar dönyasında tanılğan Michelin ülçäwe belän 3 yoldız alğan berdän ber Amerikan restoranı xucası Thomas Keller, Yunna Rezaeva belän tulısınça kileşä. Yaxşı restoran ul – yaxşı aş häm anı matur itep täqdim itü. Keller äfände Mäskäwdä 2005nçe yılda uzğan aş peşerüçelär cıyınında qatnaşqan bulğan.

Yunna Rezaeva AQŞtağı cıyınnan yaña kontaktlar alıp kitä. Üz restoranı öçen qayber yäşelçälärne ul monnan soñ Amerikanıñ Kaliforniä ştatınnan ala başlarğa mömkin, Vladivostokka Kaliforniä Mäskäwdän yaqınraq, di Yunna:

"Misal öçen bezdä äspe çıbığı, sparja – üsmi. Bez anı oçqıç belän Mäskäwdän kitertäbez. Ustritsa, diñgez aşamlıqları bezdä bar, ämma su inde pıçraq, alarnı aşarğa yaramıy, şuña bez alarnı Qıprıstan kitertäbez."

Äspe çıbığın Vladivostokka Mäskäwdän tügel, ä San Franscisco yäki Vancouvedan kitertü restoran xucabikäsenä arzanraqqa töşäçäk.

Dönyadan eşmäkär xanımnar AQŞta inde ikençe tapqır cıyıla, oyıştıruçılarğa da, qatnaşuçılarğa da, bu cıyın faydalı häm qızıqlı bula.

Alsu Qormaş
XS
SM
MD
LG