Accessibility links

дүшәмбе, 5 декабрь 2016, Казан вакыты 07:28

Törkiä bıyıl da xit bulıp qala


Menä atnadan artıq inde Qazansunıñ “İdel-Press” yarında da, “Şüräle” yal baqçası artında da alma töşärlek tä urın yuq. Bu qomlıqnı çittän, yıraqtanraq qarağanda, esselekne dä isäpkä alsañ, dön'yaküläm bilgele ber yal itü urınnarı sımanraq dip uylap ta quyasıñ. Küräseñ xalıq sanitar epidemiologiä üzäge kisätüen belmi, belgännärneñ ise kitmi. “İdel-Press” yağında duş bötenläy yuq, tege yaqta isä ikäw eşli, su sibüe dä samawır borınınnan aqqan kebek kenä. Ä bit tabiplar mondıy çista bulmağan suda qoyınğaç ta, duş astına basarğa quşa. Bu qomlıqta tärtip saqlawçılar da, qotqaruçılar da kürenmi. Qoyınu waqıtı räsmi açılmağan, şuña alar yuq, dip sıltawçılar da bar. Räsmi sannarğa küz salsañ, eç kitü awıruları ğına da may ayında 15 protsentqa artqan. Şähär sulıqlarında 18 keşe batıp ülgän. Ä Näşriät tuqtalışında xalıq mäş kilä. Kemder qoyınırğa qomlıqqa aşığa, kemder kürşedäge uram kibetenä sırağa yögerä. Qazan tiräsendäge sulıqlarnı xup kürmägännär, häm yalların çit mämläkätlärgä çığıp diñgez buylarında ütkärergä xällärennän kilgännär isä, bügenge köndä Törkiäneñ Antaliä yaqlarına oçarğa çomadan tutıra. Törle tur şirkätlär belderüençä, 10 nçı iyüngä qädär Qazannan kitüçe oçqıçlarğa biletlar satılıp betkän inde dip äytergä bula. Qaysı ğına säyäxät şirkätenä şaltıratma, barsı da 2007 nçe yılnıñ xitı tağın Törkiä inde, dip äytte. Xalıq Törkiägä ağıla. Ni öçen?

Qazannan turı oçqıçlar bar. Bıyıl isä bu çarterlar tağın da kübäyde. Çönki, Tatarstan hawa şirkätenä Törek hawa yulları da östälde.

di Salawat şirkäteneñ mödire Nailä Tärcemanova. Annan da qala, anıñ äytüençä, törek teleneñ tatar telenä yaqınlığı, ruxı yaqtan da urtaqlılar bulu Antaliägä tartıp tora. Anıñ östenä kunakxanä xezmätkärläre häm kibetçelär urıs telen su urınına eçä başlağan. Ä Yevropa illärenä, başqa kurortlarğa barsañ ingliz telen belüeñ dä kiräk bit. Diñgezneñ çistalığı, hawa torışınıñ şäp buluı da cälep itep tora. Ämma, soñğı waqıtlarda nindider başqa yal urınnarına barırğa teläuçelär dä kürengäli başlağan. Alar Mäskäw aşa da oçarğa riza ikän.

Ä ni öçen Rusiäneñ Soçi şähäre häm başqa urınnar Qazanlılarnıñ yaratqan urını tügel soñ? Çönki, anda servis, xezmät-xörmät kürsätü küpkä qalışa. Bez- turbiznes xezmätkärläre häm säyäxätçelär üzläre dä Törkiädäge serwisnıñ yıldan yıl töşä başlawın, otellärdäge rizıqlarnıñ öyelep tormawın tanıybız. Älbättä, küpmeder däräcädä moña Rusiä turistları üzläre dä gäyeple. Niçek üzlären tota, şundıy mönäsäbät tä kürsätelä alarğa.

di “Salawat” säyäxät şirkäte mödire. Ämma Törkiä barıber moda bulıp qaluın däwam itä. Çönki Rusiä otel'läre belän çağıştırğan waqıtta da anda küpkä arzanlıraqqa çığa. Misal öçen sez Antaliädшğelärne häm Qazandağı kunakxanälärneñ bäyälären genä çağıştırıp qarağız, di ul. 8 köngä Törkiägä yalğa barunıñ iñ arzan yullaması 12 meñ sumnan äz genä artığraq bula. Moña bit oçu da, kunakxanädä toru da, aşaw da, hawa alanınnan kunakxanägä qädär baru da kergän. Bıyılğı cäy säyäxätçelärne qayber üzgäreşlär belän dä kraşı ala. Ägär sin alimentıñnı waqıtında tülämägän bulsañ, YUXİDiğa ştraflarıñnı onıtqan bulsañ, banklar belän finans eşçänlegeñ tärtiptä bulmasa, menä inde oçqıçqa utıram digändä genä çik buyı tikşerüen uzğanda totqarlanıp qalırğa mömkinseñ. Böten qıyıq-mıyıklar çik saqçılarınıñ komp'yuterında bulaçaq. Qazandağı qayber turşirkätlär bu turıda üzläreneñ bülmälärenä elep quyarğa da ölgergän inde. 29 nçı may könne Qazanda Turistlıq şirkätläre berläşmäse, yäşlär eşläre sport häm turizm ministrlığı wäkilläre jurnalistlar belän matbuğat oçraşuı ütkärde. Bu soraw-cawap waqıtında säyäxätçelärgä yaxşı yal oyıştıra almağan şirkätlär isemlege dä sanaldı. Kiläçäktä ışanıçlılar isemlege buldırıluı turında da äytelde.

Nail Alan

XS
SM
MD
LG