Accessibility links

шимбә, 10 декабрь 2016, Казан вакыты 15:55

Munitsipal' berämleklär şurasınıñ ikençe qorıltayı uzdı


“Piramida”dağı cıyın räsmi räweştä respublikanıñ munitsipal' berämleklär şurasınıñ 2 nçe qorıltayı dip atala. Bügenge köndä 999 munitsipal' berämlek bar ikän, älege cıyında alarnıñ barsı da qatnaşa. Şäymievta monıñ qädär rayon, awıl citäkçeläreneñ qatnaşuı zur waqiğa dip äytep kitä. 3 säğättän artıq barğan qorıltaydan soñ qatnaşuçılarğa qimmätle “Miraj” kunakxanäsendä çäy tabını da äzerlilär. “Kön esse, cıyın eşlekle bardı, xakimiät belän xalıq yaqınaya, monıñ qädär eş eşlägännän soñ çäyläp aluda räxät” - di anda qatnaşuçı wağraq citäkçelär.

Munitsipal' berämleklär şurasınıñ 2 nçe qorıltayınıñ barışına kilgändä, cıyında Tatarstan munitsipal' berämlekneñ citäkçese, Çirmeşän rayonı başlığı Minsäğit Şäkirov xisap tota. “Respublikada cirle üzidarä reforması bara, ul zur waqiğa ğa äylände” dip süzen başlıy Minsäğit Şäkirov. Türälär bu reformanı xakimiätneñ xalıqqa taba atlağan, yöz totqan adımı diälär. Tatarstanda cirle üzidarä reforması başlanuğa yıl yarım waqıt uzğan.

Cirle xakimiättä bulğan üzgäreşlär, rayon, awıl başlıqlarına östämä mömkinlelär birä ikän, alarnıñ üzläreneñ salım qaznası bulaçaq, salımnarnıñ küpmeder öleşe awıl, rayonnıñ üzendä qalaçaq. Şul cıyılğan aqçalar cirle urınnardağı sotsial' problemalarnı çişärgä kitäçäk. Milekne terkäw bıyıl betärgä tieş dilär qorıltay xucaları, däwlätnekeme yäki munitsipal' berämlek cireme barsı da qanunda yazılğança bülgälänep betä ikän. Tatarstan munitsipal' berämlekläre şurası räise süzlärenä qarağanda, respublikanıñ rayonnarınıñ qayberläre üz-üzlären aşatıp torırlıq däräcädän dä tübän, alar respublika qazanasınnan aqça bülep birelä, läkin bu ğına citmi. Şuña kürä dä inde awıl, rayon cirendäge şäxsi kibet, ayırım oyışma salım tüläp, cirle qaznanı tulılandırırğa tieş bula. Cirle xakimiät citäkçeläre cıyınında, toraq, sotsial' taşlamalar, sälämätlek saqlaw, yullar tözü kebek problemalarğa tuqtalıp kitälär. Yullar digändä, Şämiev 3-4 yıl eçendä rayon-awıl cirendäge yullarnı taş belän qaplaw mäs’äläsen çişäçäkbez diä. Anıñ bu süzenä xätta qul çabalar. Ni disäk tä yullar, xalıqnı iñ borçığan problemanıñ berse şul di Balıq bistäse rayonı Küki cirle üzidarä citäkçese Mäwlä İsxakov. Awıl başlığı qorıltayda qatnaşa, cıyınnan qanatlanıp qaytıp kitä. “Nixayät üzebezçä, yuğarılarnıñ xäyer fatixası belän eşli başlayaçaqbız, xalıq äytkän üteneçlärne ütärgä mömkinlek tuaçaq” – di awıl başlığı. Röstäm İsxaqiy

XS
SM
MD
LG