Accessibility links

Rusiäneñ yaña raketalar sınawı: Mäskäw Amerika belän yaña aşqınıp qorallanu yarışına kereşä alamı?


Sişämbedä Rusiä amerikannarnıñ Könçığış Yewropada yaña raketa qalqanı öleşlären qoruına nindi cawap birä alaçağı xaqında xäbär itte. Berük könne anda yaña strategik häm taktik raketalar sınawı uzdı. Rusiä premyer-ministrı urınbasarı, ilneñ yaña citäkçese bulu ixtimalı zur sanalğan Sergey İvanov, Rusiäneñ şuşı yaña raketaları teläsä nindi saqlanu qalqanın ütep kerä alaçaq, dip belderä

Mäskäw Quşma Ştatlarnıñ Yewropada raketa qalqanın urnaştıru niätlärenä üzençälekle cawap qaytaraçağı turında inde küptännän belderep kilsä dä, şul cawapnıñ yaqınça nindi bulaçağı bu sişämbedä genä açıqlana töşte.

Rusiäneñ tönyaq-könbatışındağı Plesetski künegü üzägennän RS-24 digän isem birelgän strategik raketa cibärelde. Tieşle waqıt uzu belän ul, Rusiäneñ xärbi citäkçelege süzlärenä qarağanda, 5 meñ yarım çaqrım ütep Kamçatqa yarımutrawındağı aldan bilgelängän urınğa kilep tä töşkän.

"Salqın suğış"tan soñ raketa qüwäte şaqtıy qaqşağan Rusiäneñ älegä qädär RS-18 häm RS-20 digän raketaları ğına bar ide, ämma alarnıñ safta qalu çorı inde äkrenläp betep kilä. Berük waqıtta Mäskäw imzalağan xalıqara kileşülär aña yaña tör strategik raketalar eşläp çığarunı tıya. Şuña da xäzer Rusiä yağı, ayırım alğanda, premyernıñ berençe urınbasarı Sergey İvanov, RS-24 ul elekke Topol-M raketalarınıñ zamançalaştırğan ber töre genä bulıp tora, dip belderä. İvanov şulay uq, bu yaña ğına sınalğan raketa, teläsä nindi saqlanu qalqanı aşa ütäçäk, dip kisätä. Bu belderüen ul sınawlarnıñ uñışlı ğına ütüennän soñ yasadı.

Washington üz plannarınıñ niçektä bulsa Rusiägä qarşı yünälderelgän buluın kire qağıp kilsä dä, Mäskäw moña ışanmıy. Bu xaqtağı qırıs belderülär inde xäzer Rusiäneñ iñ yuğarı citäkçeläre tarafınnan yasala. Sişämbedä prezident Vladimir Putin Washington plannarın Yewropanı darı miçkäsenä äyländerügä, yaña qorallar belän tutıruğa tiñläde, alar bar dönyada yaña häm kiräkmägän qurqınıçlar tudıra, dip belderde.

Ämma yaña qoralnı şul uq könne näq menä Rusiä üze sınadı. Rusiäneñ tışqı häm iminlek säyäsäte belgeçe Yuri Fedorov fikerençä, bu Mäskäwneñ Könbatış aldında muskulları belän uynawın kürsätä:

"Bu Rusiäneñ Könbatış belän mönäsäbätlärendä süzlärdän ğämällärgä küçä başlawın kürsätkän ber işarä bulıp tora", di Londonda eşlägän belgeç.

Şuşı yıl azağında Rusiädä Duma saylawları uzaçaq, ä kiläse yıl martında ilne yaña prezidentnı saylaw kötä. Şuña da soñğı işarälärneñ Könbatışqa qarağanda kübräk Rusiäneñ üz xalqına yünälderelgän buluı bik ixtimal.

Kärim Kamal
XS
SM
MD
LG