Accessibility links

Кайнар хәбәр

Qazanda zamança çüp eşkärtü zavodı tözeläçäk


Qazan xalqı işek allarındağı çüpne çığaru öçen tieşennän azraq tüli ikän. Bu xaqta bügen ekologiä ministrlıyğında bulğan utırışta Qazan başlığı İlsur Metşin belderde. Äytergä kiräk, ul tüläw 20 sumğa yaqın ber keşe başına. Tärtip buyınça könenä 350 çüp sawıtı, yäğni konteyner çüp çığarırğa tieşbez, ä ul 3 tapqırğa kübräk dip belderde Qazan başlığı. 70 yıllarda isä çığarıla torğan çüp azraq bulğan

Xätta inde Samosıyrovo çüplegendä urın da qalmağan ikän, ä başqa çüpleklär Qazanda älegä yuq. Şuña kiläse yılda yaña ike zavod töziäçäklär ikän. Alarda isä çüp törlärgä bülenep, taslap diärlek bülep urnaştırılaçaq – yäğni sortlarğa bülenäçäk. Bu, bilgele xalıq kesäsenä suqmıy qalmas, çönki qazna aqçasına tözelmi bu ike zavod, ä investorlar xisabına. Zavodnıñ berse Qazannıñ Mäskäw, ä ikençese Waxitov rayonında bulır dip küzdä totıla.

Dimäk, xalıq sälämätlegenä häm äylänä-tirä moxitne pıçratuğa zur zıyan salğan Samosıyrovo çüplegeneñ kiräge dä qalmayaçaq. Suqbaylarğa ğına awırğa turı kiläçäk.

Älege çüplek arqasında Tatarstan citäkçelegenä dä qızarırğa turı kilä. Küptän tügel näq Yevropa tözekländerü häm üseş bankı wäkilläre kilgändä, bu Samosıyrovo çüplegendä zur yanğın çıqtı. Anı sünderü öçen distälägän maşinalar köne-töne qom taşıdılar – ımı-şımı çıqmasın öçen.

Ğomumän, Rusiädä çüp-çar probleması ğomerlek buldı. İnde berniçä yıl elek Tatarstan rayonnarında çüp sawıtları quyıldı. Qazanda alarnıñ sanı 3 meñgä yaqın ikän konteynerlar. Tağın 800 alırğa toralar. Ämma yañalarnı aludan ni fayda. Çönki alar atnaları buyı tügelmiçä, sasıp yata yort işek allarında.

Utırışta İlsur Metşin çüpne yuq itü buyınça Yevropa illäre täcribäsen ozaq öyrändek, ämma berse dä bezgä turı kilmi dip belderde. Şuña Lipetski şähäreneken qullanırğa bulğannar – zavod tözü yunäleşendä. Älege zavod 2008нче yılnıñ fevralennän eşli başlar dip farazlana. Bu şulay uq östämä eş urınnarı da buldırırğa yärdäm itäçäk dide İlsur Metşin.

Tatarstan ekologiä häm tabiğät baylıqları ministrı İrina Laroçkina moña qädär Qazanda çüplek öçen älläni borçılu bulmadı dide/

İrina Laroçkina äytkän 400 meñ tonna çüp tizdän yaña zavodta eşkärtelä başlayaçaq. Andağı cihazlar iñ zamança bulaçaq.

Landış Xarrasova

XS
SM
MD
LG