Accessibility links

сишәмбе, 6 декабрь 2016, Казан вакыты 21:00

Çallı yağulıqqa däğwa belderä


Avtomobil' yağulığınıñ sıyfatı bik naçar. "Rusiä avtomobil' citeşterüçelär berlege"neñ çirattağı utırışında şundıy dägwa belderelde. Älege utırış Çallıda ütte häm äytep kitelgän "Rusiä avtomobil' citeşterüçelär berlege"neñ räise bulıp KamAZ generalı Sergey Kogogin tora. Cıyılışqa matbuğat wäkilläre kertelmäde. Şulay da Avtomobil' şirkäteneñ mäglümät deportamentı söyläşüneñ qayber näticälären jurnalistlarğa citkerde. Annan kürengänçä, äñgämä Rusiädä citeşterelgän yağulıqnıñ sıyfatı xaqında bara. 2008 nçe yıldan başlap Rusiä avtomobil' şirkätläre "Yevro-3" standartlarına turı kilerlek maşinalar citeşterergä tieş. Bu - ekologik taläplär belän bäyle standart. Läkin mäsäläneñ ikençe yağı bar ikän. Yevro-3 maşinaları citeşterelä başlasa, alarğa yaraqlı yağulıq ildä yuq däräcäsendä. Bügenge yağulıqta kükert qatnaşması küp häm anıñ belän yaña model' avtomobil'lärne yörtergä kiñäş itelmi. Şunıñ belän Rusiä avtomobil'çeläre qıyın xäldä qala - dönya standartları yaña maşina taläp itä, ä menä aña salırğa yağulıq yuq. Bu uñaydan utırışta "Rusiä avtomobil' citeşterüçelär berlege"neñ başqaruçı direktorı İgor Korovkin mondıy fiker äytä:

- "Sıyfatlı yağulıqqa küçü öçen çistartu qorılmaları kiräk. Monıñ öçen här zavod 20 mln. sum aqça kertergä tieş. Yağulıq yasawçılarda mondıy aqça bar". Şuşı süzlärdän soñ berlek räise Sergey Kogogin süz ala: "Yağulıqnıñ sıyfatın yaxşırtuğa bezneñ investetsiäneñ faydası yuq. Üz kompaniäbezgä zıyan ğına kiteräbez. Bez bolay da Yevro-3 dvigatel'läre yasaw öçen millionnar sarıf itäbez, ä menä sıyfatlı yağulıq haman da yuq". Kogogin äytüençä, Rusiä avtomobil' citeşterüçeläre, yağulıq tärtipsezlegen, (ul anı topliwnıy) bardaq dip atıy, şuşı tärtipsezlekne beterü buyınça xökümätkä möräcäğät itäçäklären belderde.

Moña östäp şunı äytep bula, benzin magnatları sıyfatnı üz xisaplarına yaxşırtamı, yäki avtomobil'çelär cilkäsenä salırmı? Bu sorawğa yaqın arada açıqlıq kerergä mömkin.

Ğafiulla Ğaziz, Çallı

XS
SM
MD
LG