Accessibility links

сишәмбе, 6 декабрь 2016, Казан вакыты 08:47

Omskida “Soñğı qıñğıraw”


Yäkşämbe könne Omskinıñ “Qızıl Gvardiä” mädäniät sarayında eşläwçe tatar tele fakul'tativında bıyılğı uqu yılınıñ soñğı därese ütkärelde. Anda ata-analar häm tatar cämäğätçelege wäkilläre dä buldı. Däres “soñğı qıñğıraw” dip isemlängän ide häm tantanalı räweştä ütte. Äytergä kiräk, tatar tele fakul'tativı uqu yılı başında älege mädäniät sarayına “Ömet” studiäsenä yörüçe balalar öçen oyıştırılğan ide. Tora-bara däreslärgä başqalar – üzeşçän sänğät tügärägendä şöğellänmäwçe balalar da yöri başladılar. Şunsı da qızıqlı, tuğan tellären belmägän qayber ata-analar üzläre dä balaları belän bergä parta artına utırdılar. Näticädä uqu yılı axırında fakul'tativta şöğellänüçelär sanı 30 ğa citte.

Älege däres qıñğıraw çıltıratıp, balalarnı bäyräm belän qotlawdan başlanıp kitte.

Däres barışında balalar üzläreneñ ireşkän uñışların kürsättelär – ayırım süzlärne rusçadan tatarçağa tärcemä ittelär, cömlälär tözedelär, tatarça sanap kürsättelär, ber-bersenä sorawlar birdelär.

Älbättä, ber uqu yılı eçendä genä balalar tuğan telebezne yaxşı öyrängännär dip äytep bulmıy. Uqıtuçı Nuriä Kuçukova da däresne kübräk rus telendä alıp bardı.

Şunı da äytep ütü urınlı bulır, däres şähär milli-mädäni möxtäriäte yärdäme belän balalar öçen istälekle bulırday itep äzerlängän ide. Uquçılarğa ikençe sıynıfqa küçüläre turında iğlan itelde, alarnıñ küplärenä “yaxşı” häm “bik yaxşı” bilgeläre quyılğan tabel'lär taratıldı häm ayıruça aktiv balalarğa maqtaw käğäzläre birelde. Ata-analar da bötenläy iğtibarsız qalmadılar – alarnıñ qayberlärenä möxtäriät isemennän räxmät käğäzläre tapşırıldı. Soñınnan aralaşu ğomumi köç belän äzerlängän çäy östäle artında bardı.

Uqu yılı tämamlansa da, balalar älegä bötenläy yalğa taratılmadılar. Alarnıñ “Ömet” studiäsendä şöğellänüçeläre repetitsiälärgä yöriäçäklär, ölkännär belän bergäläp aldağı bäyrämnärgä, ölkä häm şähär külämendä ütkäreläçäk çaralarğa äzerlänäçäklär. Ä alda, iyün ayında, Rusiä könendä “Cırlı qır” festivale, “Tatar cırı” bäygese, ölkä häm şähär Sabantuyları, soñraq, avgustnıñ berençe yal könnärendä şähär köne bäyrämnäre häm başqa çaralar bulaçaq. Sabantuylarğa kilgändä, ozaq yıllar bulmıy torğannan soñ milli bäyrämebez bıyıl Omskida da ütäçäk. Şähär Sabantuyın oyıştıru belän şähär milli-mädäni möxtäriäte häm iqtisat häm mädäniät buyınça “Tatarstan-Omsk” partnerlıq oyışmasın tözü östendä eş alıp baruçı ber törkem eşmäkär yegetlär şöğellänä. Häm äytergä kiräk, boz inde urınınnan quzğaldı, bügenge köndä qızu äzerlek eşläre bara. Şähär xakimiäte dä bu Sabantuynı ütkärügä üzeneñ öleşen kertä - grantlar konkursı aşa Sabantuy proyektına 100 meñ rubl' aqça bilgeläde. Grant sertifikatı şähär milli-mädäni möxtäriäte citäkçese Ğafiä Aleeva qulına inde tapşırıldı.

Sabantuylar bıyıl Ust'-İşem, Tara, Tevriz, Kolosovqa rayonnarında da bulaçaq.

Rozaliä Sayganova, Omski

XS
SM
MD
LG