Accessibility links

шимбә, 3 декабрь 2016, Казан вакыты 22:46

Bötendönya Başqort qorıltayına – 12 yıl


Bötendönya Başqort qorıltayı oyıştırıluğa 1 iyün könne 12 yıl tuldı. Şuşı uñaydan Qorıltay citäkçelege “Başinform” mäğlümat agentlıysında jurnalistlar öçen matbuğat oçraşuı ütkärde. Anda Bötendönya Başqort qorıltayı Başqarma komitetı idäräse räise Rumil Aznabaev, anıñ urınbasarı Qadıym Aralbaev, şulay uq professorlar Räşit Şäkür, Mars Yuldaşev häm Fänil Fäyzullin qatnaştı.

Bötendönya Başqort qorıltayı başqarma komitetı räise Rumil Aznabaev oçraşunı açıp, qorıltaynıñ ğomumi eşçänlegenä häm soñğı ber yıldağı xästärleklärgä küzätü yasadı. Anıñ süzlärençä, Başqort qorıltayı soñğı waqıtta Başqortstannan çittä yäşäwçe başqortlarnıñ milli-mädäni mänfägat'lären yaqlaw täñgälendä zur eşlär başladı. Rumil Aznabaev bu aktivlıqnı Başqortstannıñ Rus däwlätenä quşıluına 450 yıllıq yubileyğa äzerlek belän dä bäyläp añlattı.

“Şuşı yubileynı çit töbäklärdä yäşäwçe başqortlar belän bäyläneşlärne nığıtuğa, alarnıñ mänfägat'lären kiñräk yaqlawğa da faydalanırğa tieşbez - dip belderde Rumil Aznabaev. – Monıñ öçen Rusiäneñ törle töbäklärendä Qorıltaynıñ büleklären açu däwam itä”.



Bötendönya Başqort qorıltayı Başqarma komitetı idäräse räise Rumil Aznabaev buldı. “Başinform” mäğlümat agentlıygında ütkän matbuğat oçraşuında başqa qunaqlar da Bötendönya Başqort qorıltayınıñ eşçänlegenä bäyle sorawlarğa cawaplar birde.



Qadıym Aralbaev äytüençä, Bötendönya Başqort qorıltayınıñ Mäğärif bülege ayıruça zur eş başqara soñğı waqıtta. Çit töbäklärdä yäşäwçe başqortlarnıñ üz ana tellärendä belem alularına mömkinleklärne buldıru häm başqa törle çaralar oyıştıru xaqında baytaq mäğlümatlar birde ul.

“Bez çit töbäklärdäge millättäşlärne üz ana telebezdä uqıtu buyınça çaralarnı elektän dä kürä kilgän idek, - di Qadıym Aralbaev. - Ä menä bıyıl bu maqsatta täğäyen ber plan qabul ittek. Anda çit töbäklärdä yäşäwçe millättäşlärebez öçen başqort mäktäpläre häm başqort sıynıfları açu burıçları bilgelänä. Şul uq waqıtta çittä ğomer kiçerüçe millättäşlärneñ balaların Başqortstandağı yuğarı häm maxsus urta belem birü yortlarına çaqıru mömkinlegen dä buldırabız.Ufadağı yuğarı uqu yortlarına kertü öçen kvotalar ayırtabız”.

Bötendönya Başqort qorıltayı Başqarma komitetı citäkçeläre başqort xalqınıñ milli-mädäni mänfägat'lären yaqlawdan tış başqa möhim mäs'älälär toruın da äytte. Misal öçen, cirgä xuca bulu xoquqı turında da fikerläre belän urtaqlaştı alar. Başqortstanda çittän kilüçelärgä cir bilämäläre uñğa-sulğa taratılırğa tieş tügel, digän fikerne assızıqladı alar. Cirgä şuşında yäşägän töp xalıq, yäğni başqortlar xuca bulırğa tieş, dip kisterep äytä Bötendönya Başqort qorıltayı citäkçeläre häm monı respublika citäkçelege añına da señderü burıçın üz aldına quya.

XS
SM
MD
LG