Accessibility links

Кайнар хәбәр

Peterburnıñ Keçe drama teatrı Qazanda 3 äsären kürsätä


Rusiäneñ öçençe başqalası bulunı däğwälağan Tübän Novgorod, bu oçraqta Qazanğa ottırdı, di Akademiä keçe drama teatrı- Yevropa teatrı sänğät citäkçese Lev Dodin. Bu süzlärne ul teatrnıñ Qazanda gastrol'läre başlanu aldınnan matbuğat oçraşuında äytte. 3 yılğa suzılaçaq bu Rusiä teatr sänğäte tarixında berençe tapqır bulğan säfärneñ älegä bilgele bulğan isemlegendä Keçe drama teatrı Tatarstan başqalasında çığış yasağaç, Arxangel'skiğa, Pskovqa, Novosibirskiğa häm annan soñ ğına Tübän Novgorodqa yul totaçaq. Ni öçen Qazan berençe bulğan soñ? Dodin äytüençä, moña ike şart etärgeç yasağan. Berençese Kaçalov isemendäge Qazan akademiä zur drama teatrınıñ baş rejisserı Slavutski belän küptänge tanışlıq bulsa, ikençedän bu teläkne Tatarstan citäkçelege kütärep alğan. Annan da qala, mondıy zur törkemne häm klassik teatrnı Rusiä buylap säfärgä alıp çığu öçen ximayäçelär dä kiräk. Qazandağı matbuğat oçraşuına qädär ber kön aldan Mäskäwdä İTAR-TASSta ütkän oçraşuda şundıy yärdämçelär- Rusiäneñ sänäğätçelär häm eşmäkärlär berlege räise Aleksandr Şoxin, “Sänğät häm sport” ximayä fondı citäkçese Romil' Nasretdinov ta qatnaştı.

Bezgä soñğı yıllarda Rusiä şähärlärenä säfärgä çığuğa qarağanda, çit illärgä baru ciñelçeräk ide. Bez Antariktida belän Afrikadan qala böten cirdä dä buldıq

dide Dodin. Ul Rusiädä soñğı 15-20 yıl eçendä akademik, klassik teatrlarnıñ säfärläre bötenläy bulmawın da äytep uzdı. Anıñ belderüençä, soñğı yıllarda bik yışayıp kitkän, ike urındıq, ber östäl kütärep 3-4 akternıñ yulğa çığuı zur sänğät tügel äle ul. Akademiä keçe drama teatrı- Yevropa teatrı Qazandağı tamaşaların 22 yıl säxnädän töşmägän, dönyanıñ 50 şähärendä quyılğan “Brat'ya i sestrı” äsäre belän başlıy. SSSR däwlät bülägenä iä bu spektakl' 1991 yılda Britaniädä çit illärneñ iñ yaxşı spektakle digän bäyägä iä bula. Ä İtaliädä isä UBU premiäsen ala. Annan da qala Qazanlılar Çexovnıñ “Dyadya Vanya” sın, Petruşevskinıñ “Moskovski xor”ın da küräçäk. Matbuğat oçraşuında qatnaşqan Tatarstan xökümäte başlığı urınbasarı, mädäniät ministrı Zilä Wälieva: “İñ yaxşı äyberlärne, bu oçraqta suz 20 yıldan artıq säxnädän töşmägän äsär turında bara. Bez üzebez dä beläbez 25 yıllıq “Äldermeştän Älmändär”yebez bar. Şöhrät qazanğan spektakl'lär xalıqqa kürsätelergä tieş”,-.dide.

Matbuğat oçraşuı waqıtında Akademiä keçe drama teatrı- Yevropa teatrı artistlarınıñ teatr sänğäten öyränüçelärgä häm eşläwçelärgä master-klasslar da ütkärüe turında äytelde. Bu säfär Qazan artistlarına ürnäk, ä tamaşaçılarına bäyräm bulır dip kötä oyıştıruçılar. Älege yazmanı efirğa äzerlägän waqıtta bez Kaçalov teatrına şaltıratıp biletlar qıybatmı, dip soradıq. 200 sumnan 600 sumğa qädär. Kilegez kil, barlıq spektakl'lärgä dä biletlar bar, dip äyttelär.

Nail Alan

XS
SM
MD
LG