Accessibility links

якшәмбе, 4 декабрь 2016, Казан вакыты 09:17

“Dastan” klubında milli kiçä


Yıl sayın Qazan şähäreneñ ciñel sänäğät texnikumına Tatarstan respublikasınnan, häm başqa kürşe töbäklärdän bik küp uquçılar hönär alırğa kilälär. Kübeseneñ tatar telen belüläre çamalı ğına bulsa, qayberäwläre ber awız süz dä tatarça belmilär. Texnikumda rus, mari, çuaş, häm xätta qayber tatarlar da däreslärdä telne añlarğa, berençe tapqır “äni”, “äti” kebek süzlärne äytergä öyränälär ikän. “Mäktäplärdä un yıl buyı uqıp söyläşmägän balalar da, monda kilgäç cırlap söyläşälär”,- di, inde 32 yıl buyı tatar telen uqıtqan Gölfizä xanım Mullanurova. Yaña ğına 9-sıynıfnı tämamlap, şähärgä çığıp kitkän studentlarğa ul ikençe äni kebek: ul möläyem, yağımlı da, taläpçän dä di alar. Tatar tele däreslärendä başlanğan eşlär, texnikum qarşında eşläp kilgän “Dastan” klubında üz eşen däwam itä. Yıl däwamında studentlar tarafınnan törle sänğät eşlekleläre qatnaşlığında çaralar uzdırıla. Däreslärdä öyrängän cırlar, şiğerlärebezne şundıy kiçälärdä bez ğämäldä qullanabız, tatar telendä xalıq qarşında oyalmıyça söylärgä öyränäbez, di älege klubqa yörüçelär.

Pänceşämbe könne “Dastan” klubınıñ bıyılğı sezonı yabılu çarası bularaq Älmät şähärendä eşläp icat itkän şağirä Läysän Käşfineñ icat kiçäse uzdı. Älmättän kilgän kompozitor El'mira Gil'fanova belän berlektä icat itkän cırlarnı yäş cırçılar Salawat Taysın häm Al'bina Zakirovalar başqardı.

Başqaladan yıraqta yäşäsä dä Läysän xanım Käşfiewa icattaş dusların inde Qazanda da tabırğa ölgergän. Yäş başqaruçı häm kompozitor Ämir Latıypov icat itkän Gölnara Mullanurova tarafınnan başqarılğan cırlarnı yış işetergä turı kilä. Şularnıñ berse “Yaña ğasır” radiosı aşa xalıqqa citkerelgän “Tılsımçı qız” cırı. Bu kiçädä Gölnara tamaşaçılarğa üze icat itkän cırnı işetterde. Qazanda tuıp, bıyıl şähärneñ 13 sanlı mäktäben tämamlağan qız, ciñel sänäğät texnikumınıñ milli sänğät uçağına yalqın östäde.

Texnikum talipları üzläreneñ hönärlären kilgän qunaqlarğa, tamaşaçılarğa kürsätep qalırğa aşıqtılar. Çikkän sölgelär totqan qızlarnıñ tatar biyuen başqaruı, Liliä Şärapovanıñ saf tatar telendä şığır söyläwe tatar tele häm ädäbiäten üsterü buyıñça koordinatsion üzäktän kilgän wäkillärgä ayıruça oşadı.

Tatar teleneñ ähämiäte kimi, bigräk tä yäşlär arasında ğomum qullanılışta yöremi, dip açınıp söylägänne yış işetergä turı kilä. Rusça yäşi torğan ber millionlı şähärneñ ber texnikumında mondıy zar işetelmi. İxlas eşli torğan keşeläre bulğanda tatar tele şähärne dä üz itä.

El'mira Gazizova

XS
SM
MD
LG