Accessibility links

якшәмбе, 11 декабрь 2016, Казан вакыты 01:15

“Naşi” yäşlär xäräkätendä pravoslaw bülegen açu ğädäti küreneşme?


Mäskäwdäge “Naşi” yäşlär xäräkäte üzeneñ ber tarmağı itep – pravoslaw bülegen açarğa niätli. Kreml' yaqlı - tarafdarı bulğan älege säyäsi-ictimaği xäräkät monı Rus Pravoslaw çirkäwe yärdämendä başqaraçaq. “Kommersant” gäcite yazğança, Rus Pravslaw çirkäwe älege xäräkät citäkçelegenä härdaim üpkä belderep kilgän – pravoslaw yäşläre belän eşlämisez dip. Şunıñ näticäse bularaq, alar ciñ sızğanıp eşkä totınğan. Kiläçäktä älege provoslaw bülekneñ üz citäkçese bulaçaq, anda kergän yäşlär mäktäplärdä, lager'larda provoslaw dinen cäyelderü büença çaralar uzdırırğa niätli. Bu äle alarnıñ berençel maqsatları ğına. Rusiä küpmillätle häm küp dinle däwlät bulğannı isäpkä alsaq, bilgele bu ber dinne genä östen quyu bula. Härxäldä Tatarstanda bu xälne şulay dip bäyälilär.

Berniçä yıl elek oyışqan häm Kreml' aldında härdaim tälinkä totıp torğan “Naşi” yäşläre xäräkäteneñ yaña pravoslaw bülege inde bu ayda uq eşkä kereşäçäk. Yäğni “Naşi” wäkilläreneñ Tver' ölkäse Seleger küle yanında uzaçaq yıllıq cıyılışına inde pravoslaw ruxaniları çaqırılğan. Anda maxsus çirkäw tözelep ğibädät qılular qaralğan. Şunda älege pravoslaw bülekneñ kiläçäkkä burıçları da bilgeläner dip kötelä.

Berniçä yıl elek Rusiä töbäklärendäge möselman yäşläre urmanğa yalğa çıqqaç, alarnı vahabçılar cıyını dip ğayıpläp çıqqannarı mäğlüm. Ä bu cıyında isä ğibädätlärdän tış, provoslaw dine buyınça leksiälär, uqıtular da qaralğan. Bu cıyın “Naşi”dağı yäşlärne pravoslaw dinenä öndäw bulıp tora dimäk. Xäräkätneñ ber qanatı ğına pravoslaw bula dielsä dä, cıyına kilgän härqaysı inde bu ğibädätlärdä, däreslärdä qatnaşaçağı xaq başında. Tatarstandağı möselman wäkilläre dä, yäşlär dä ällä mondıy küreneşlärgä iäläşte, ällä inde küzätep barmıylarmı ğäcäpsenü belderüçe bik bulmadı.

Tatarstan möftie urınbasarı, möselman yäşläre eşçänlege öçen cawaplı Söläyman xäzrät Zaripov:

Din däwlät ayırılğan, şuña monı eşläw döreslekkä turı kilmi. Mäsälän, säyäsi xäräkättä bez möselman blogın yasıy qalsaq bu bolğançıqqa kitäçäk. Rusiädä bolay da bu mäs'älädä añlaşılmawçanlıq şaqtıy.

Möfti urınbasarı Söläyman Zaripov din däwlättän ayırılğan disä dä, “Başqa Rusiä oyışması wäkile Sergey Udal'sov Rus pravoslaw çirkäwe küptän inde bäysez tügel häm xakimiät tarafdarı bulıp tora di.

Tatar yäşläre forumı Byurosı citäkçese İlşat Säetov:

Rusiä öçen bu ğadäti küreneş. Ägär alar pravoslau oyışması ğına bulırğa telilär ikän isemnärendä bu çağılırğa tieş, ägär alay tügel ikän pravoslau qanatı kebek başqa dini büleklär dä bulırğa tieş. Miña qalsa, bu berençe çiratta xäräkätneñ üzen kürsätü öçen eşlänä.

Tatar yäşläre Forumı citäkçese İlşat Säetov pravoslaw qanat yasaw ul küpmeder däräcädä xäräkätneñ bülenüe dip sanıy. Ä “Naşi” xäräkätenä qarşı tarafdarlar bu - dinne üz maqsatlarda qullanu dip assızıqlıy “Kommersant” gäcitenä. Yäğni dini beleme bulmağan yäşlärneñ, citäkçelek quşuı buyınça ğına barlıq pravoslawlar isemennän fikerlären belderüläre döreslekkä turı kilmäyäçäk, di alar.

Läkin pravoslaw qanat wäkilläre zurdan qubıp eşlärgä cıyına. Häm berençe çiratta mäktäplärgä ütep kerep pravoslaunı uqıtırğa, çirkäwne häm pravoslaw mädäniätne yaqlarğa cıyına. “Bez barısın da Rus pravosaw çirkäwe belän genä kiñäşläşep eşliäçäkbez”, - di “Naşi” xäräkäte citäkçese Vasiliy Yäkemenko “Kommersant” gäcitenä.

Landış Xarrasova

XS
SM
MD
LG