Accessibility links

җомга, 9 декабрь 2016, Казан вакыты 18:27

Tatarstan mäktäplärendä “Din tarixı” uqıtıla başlayaçaq


Rusiä töbäkläre mäktäplärendä Pravoslav mädäniäte nigezlären uqıtu cäyelä başlağaç, borçılu belderep Tatarstan Prezidentı Mintimer Şäymiev “Din tarixı” däreslegen äzerlärgä yöklämä birgän ide. Anıñ buyınça Tatarstannıñ mäğärif häm fän ministrlığı belän “Russkoe slovo” näşriäte, ayırım alğanda, Mäskäw ğalimnäre eşkä kereşte. Däreslek tiz arada äzerlände häm inde anıñ nigezendä berniçä tapqır fiker alışu da buldı. Ayırım alğanda, elekke bulğan utırışlarda xristian dine bülegenä kübräk urın birelü, eçtälekneñ awır yazıluı, yäğni añlaşılmawına qänäğätsezlek belderülär bulğan ide. Sişämbe könne utırışta älege citeşsezleklärneñ beterelüe äytelde. Ämma qayberläre barıber qalğan bulıp çıqtı. Mäsälän, däreslektä xristian, islam, iudaizm häm buddizm dinnäre bülekläre ber-ber artlı birelgän. Utırışta isä bu döres tügel, älifbadağı xäreflär nigezendä birü kiräk ide, yäğni berençe xristian tügel, ä buddizm dine urın alırğa tieş ide dielde. Monı Tatarstan mäğärif häm fän ministrı Räis Şäyxelislamov däreslek yazuçılarnıñ bu urtaq fikere buldı, xristian dine iñ küp qullanıla torğan din dide.

Rusiä İslam universitetı ğalime Rafiq Möxämmätşin isä qayber qänäğätsezleklär turında menä närsälär äytte:

“Däreslektä kereş öleş yuq. Monotoistik dinnär kilgänçe nindi dinnär bulğanı yazılmağan. Annarı inde xäzerge dini wäzğıät turında häm traditsion bulmağan dinnär xaqında bülek yuq digän fikerlär buldı. Läkin bäxäslär konstruktiv dip äyter idem min. Ä konseptual' yaqtan alar bar da törle. Ägär dä alarnıñ barsın isäpkä ala başlasañ, däreslek qalmayaçaq. Şuña kürä alarnıñ mömkin bulğannarı älbättä isäpkä alındı, nigezdä däreslek niçek itep yazılğan, koordinal' üzgärmäde.”

Rafiq Möxämmätşin älege däreslekne äzerlägän Tatarstan yağınnan üz berdänber ğalim. Ul İslam bülegen yazdı. Däreslek turında ul bolay dip däwam itä:

Tuleam äytkändä däreslek yaxşı yazılğan, moña qadär İslam turında bolay eçtälekle yazılğan däreslek yuq ide.”

Rusiä İslam universitetı rektorı Rafiq Möxämmtşin äytüençä, älege däreslek tizdän basılıp çığaçaq häm közgä mäktäplärgä keräçäk. Ämma äle anı uqıtuçılar äzerläw zarur ikän. Monı kemnär uqıtır älegä bilgesez. Ul töp fän bularaq kermäyäçäk. Tatarstan mäğärif häm fän ministrı Räis Şäyxelislamov bolay di:

Fän bularaq kerä almıy, ul respublika komponentı nigezendä uqıtılaçaq

Räis Şäyxelislamov älege däreslek buyınça uqıtıp qaraw barlıq mäktäplärdä tügel, ä respublikanıñ berniçä uqu yortında ğına başqarılaçaq di:

“Xäzerge waqıtta älege däreslek buyınça uqıta torğan mäktäplär bilgelänä.”

Tatarstan mäğärif häm fän ministrı Räis Şäyxelislamov äytüençä, älege däreslek Tatarstan öçen genä eşlänsä dä, Rusiä töbäkläre mäktäplärenä dä täqdim iteläçäk. İnde qızıqsınuçı töbäklär bulğan.

Landış Xarrasova

XS
SM
MD
LG