Accessibility links

дүшәмбе, 5 декабрь 2016, Казан вакыты 13:33

Ruminä “Ğalämneñ keçkenä çibäre” bülägenä iä buldı


Ruminä älegä Misırda. Anı şuşı könnärdä Qazanğa qaytıp citär dip kötälär. Ä menä çärşämbe Mäskäw waqıtı belän kiçke cidedä Rusiä başqalasında ikençe ber çara “Rusiäneñ keçkenä çibäre” bäygese başlandı. Anda Tatarstan danın yaqlaw öçen milli kiemnärdä 4 qız säxnägä çıqtı. “Miss Tatarstan” ictimaği oyışmasınıñ prezidentı İzol'da Saxarova, qızlar nindi genä millättän bulmasınnar, alar Tatarstan danın yaqlıy, dide.

Barlıq bäygelär waqıtında da, Rusiä isemennän çığış yasağanda da bezneñ keçkenä qızlar tatar milli kiemendä säxnägä çığa. Bezneñ Tatarstan mädäniäte belän yaxşıraq tanışsınnar öçen monı maxsus şulay eşlibez. Başta Qazaqstan belän butağan oçraqlar da bulğaladı. Keçkenä qızlarnıñ tatar cırları cırlap, biep, milli kiemnärdä säxnägä çığunıñ zur maqsatı bar. Alar bezneñ mädäniät belän başqalarnı da tanıştıra, di İzol'da Saxarova.

Äle yaña ğına Tatarstanğa Gran-pri kitergän Misırda ütkän bäygegä kilsäk, “Ğälämneñ keçkenä çibäre” çarasında dönyanıñ törle ilennän 50 qız qatnaşqan. Alarnıñ 26 sı finalğa ütkän. Tatarstannan barğan 4 qız da berençe unlıqqa kergän. İñ zur büläkkä iä Ruminä üze öçen maxsus tegelgän tatar milli kiemendä säxnägä çığıp, tuğan cire turında söylägän. Döres, anıñ çığışı tatar milli icatınnan ğına tormağan. Ul “Bal qortı” biyuen dä, Qıtaylarnıñ “Kübälägen”dä, kürenekle balet biyuçese Anna Pavlovanıñ “Qaliforniä tılsımçısın” da başqarğan.

Tatarstanda “Mini miss” bäygese ütkärelä başlağanğa 6 yıl buldı. Şuşı 6 yıl eçendä bez xalıqara bäygelärdä qatnaşırğa tırışabız, di İzol'da Saxarova. Tatarstannıñ keçkenä qızları Braziliä, Dominikan respublikası, Fransiä, Pol'şa, Törkiä, Qıprıs, Bolğarstan häm başqa illärdä ütkän bäygelärgä milli tatar kiemnäre dä alıp barğan. Alar kübesendä aldınğı urınnarnı alğan.

Çaqırular küp, ämma bez barsında da qatnaşa almıybız. Xalıqara bäygelärneñ finans çığımnarı zur, di Saxarova. Anıñ äytüençä, Tatarstan xökümäte bu çaralarnı añlıy, buldıra alğan qädär yärdäm itärgä tırışa. Bu mini miss bäygeläre turında baliğ bulmağan balalarnı säxnägä çığarunıñ nigä kiräge bar dip äytüçelär dä bar.

Balalar arasında ütkän bu bäygelär maturlıq häm sälät bäygeläre dip atala. Şuña kürä säxnägä matur külmäk kiep matur itep yöri belüçelär genä tügel, ä matur itep bii belgän, şiğer yazğan, matur cırlağan balalar menä. Alar berençe çiratta bik sälätlelär. Yämsez balalar bulmıy, ä bäygelärdä qatnaşuçılar şunıñ östenä bik sälätle dä, di Miss Tatarstan ictimaği oyışması prezidentı İzol'da Saxarova.

Nail Alan

XS
SM
MD
LG