Accessibility links

пәнҗешәмбе, 8 декабрь 2016, Казан вакыты 19:09

Rusiä könyağında millätara kierenkelek arta bara


Rusiädä yaña Kondopoga çığarğa tora, bu yulı ilneñ könyağındağı Stavropol'' yaqlarında. Ölkä üzägendä yäşäwçe yözlägän urıs şähärdän çeçännärneñ quıluın taläp itä. May azağında anda çeçännär belän urıslar arasında bäreleşlär bulğan ide, şunda ber çeçen yegete üterelde. Şunnan soñ uzğan atnada Stavropol''dä ike urıs yegeten çänçep üterdelär. Urıs yağı monı çeçennarnıñ üçe dip qabul itte häm xäzer anda yaña bäreleşlär kötep yäşilär.

Stavropol''däge xakimiät Gelani Ataev digän şul çeçen yegetenıñ 24-nçe maydağı bäreleşlärdä alğan yaradan ülüe xaqında belderä. Ämma Gelanineñ dustı, anıñ belän bergä bulğan Zaurbäk Äxmätov, bu xaqiqätneñ ber genä öleşe di. Anıñ belän radiobıznıñ Tönyaq Kavkaz xezmäte xäbärçese söyläşkän ide.

Ataevnıñ ülüe çınnan da slavän taqırbaşları qıynawı näticäsendäge yaralardan bulsa da, moña üz öleşen bäreleşlärne tuqtatu öçen çaqırılğan OMON häm cirle militsiä dä kertte, di Äxmätov:

"Alar, yäğni OMON, taqırbaşlarnı, "äydä, çurkalarnı üteregez" dip qotırtıp tordı, moña militsiä dä quşıldı, "sez kübräk, alar az, biregez kiräklären" dip oçındırdı. Alar şulay qotırtmasa, barısı da tınıç qına taralır ide. Militsiä başta Gelanigä boğawlar saldı, häm şul kileş anı taqırbaşlarğa tapşırdı. Min borılıp qarağanda, Gelanine öç taqırbaş qıynap yata ide, şunnan soñ min tiz genä yögerep kilep, alarnıñ bersen çitkä etärdem, ämma şunda mina ut açtılar, ike ayağıma da tidelär. Min tezemä yığıldım. Şunnan soñ bezne UAZğa alıp taşladılar, ul çaqta Gelani äle sulıy ide", dip sürätli may azağındağı xällärne Stavropol''dä yäşäwçe çeçen Zaurbäk Äxmätov.

Zaurbäk süzlärennän añlaşılğança, soñraq yaralarınnan ülgän Gelani Ataev qıynalır aldınnan boğawlanğan bulğan, häm ul militsiä bülekçäsenä dä şul kileş alıp barılğan. Maşinada ul inde añın yuğaltqan ide, taqırbaşlar qıynağançı aña militsiä dä berniçä märtäbä buğazına çuqmar belän suqqan bulğan, di bar bu xällärne kürgän Zaurbäk Äxmätov.

Ul şuşı süzlären yünneñ 5-endä äytte, ä aña qädär ul totqında ide. Zaurbäk älegä qädär bu waqiğälär turında açıqtan-açıq söylägän berdänber şahid. Märxüm Gelani Ataevnıñ ätise Ruslan, başqaları bu xaqta süz äytergä qurqa, alar xakimiätneñ andıy qırın eşläre xaqında berni äytä almayaçaq, di:

"Bu üterü fäqät xökümät keşeläre tarafınnan buldı, bu şöbhäsez. Şuña da tikşerü eşläre alıp barılmıy", di Ruslan Ataev.

Anıñ ulınıñ üleme millätara qarşılıqlarnıñ başı ğına bulıp çıqtı. 9 kön ütü belän Stavropol''dä tönlä ike yäş urıs studentı - Dmitri Bloxin häm Pavel Çadin çänçep üterelde. Politsiä bu cinayätneñ öleşçä videoğa töşerelüen xäbär itte häm şunıñ nigezendä ber höcüm itüçeneñ yaqınça qiäfäten bilgeläde. Annan kürengänçä, ul çeçengä tügel, kübräk slavän keşesenä oşıy. Ämma şuña da qaramastan, Stavropol''neñ urıs xalqı, yäş studentlarnı Ataev ülemenä üç itep näq menä çeçennar ütergän dip uylıy. Alarnı cirlägän könne, yünneñ 5-endä, şähärdä yaña uram cıyını buldı, anda yänä taqırbaşlar häm urıs millätçe oyışmaları wäkilläre qatnaştı.

Militsiä barlığı 51 keşene qulğa aldı, şularnıñ 2-se haman da saq astında qala birä.

Kärim Kamal
XS
SM
MD
LG