Accessibility links

шимбә, 3 декабрь 2016, Казан вакыты 05:32

Zur 8lek: Bush Putin belän oçraşa


Zur 8lek sammitı bügen Germaniäneñ Heiligendamm şähärendä açıldı. Köntärtibendä iñ berençe urında klimatnıñ cılınuı mäsäläse torsa da, küplärneñ iğtibarında AQŞ häm Rusiä prezidentlarınıñ oçraşuı. Mäskäw belän Waşington arasındağı kierenkelek bu yulı – AQŞnıñ raketa qalqanı plannarı arqasında artıp kitte.

Baltıyq buyında Germaniäneñ tönyağında dönyanıñ iñ bay illäre citäkçeläre 3 kön bulıp, küp mäsäläne tikşeräçäk. Alar arasında iñ borçığanı – klimat üzgäreşläre bulıp qala. Ğalimnär fikerençä, dönyanıñ yıldan-yıl cılına baruına töp öleşne yapma gazlar kertä. Waşington bu tör gazlarnı kimetügä qarşı çığa. Şulay uq sammitta İrannıñ atom eşçänlege häm Serbiäneñ Kosovo töbäge kiläçäge kebek mäsälälär qaralaçaq.

Ämma köntärtibe östendä zur ber bolıt tora, ul da bulsa – Rusiäneñ AQŞ plannarına açuı. Waşington Çexiä häm Polşada raketalardan saqlanu cihazları urnaştırırğa cıyına. Mäskäw bu cihazlarnıñ Rusiägä qarşı yünälderelgän buluına açu belderä. Waşington isä qalqannıñ İran häm Tönyaq Koreadan saqlanu öçen eşlänäçägen äytä.

Sammit aldınnan Rusiä prezidentı Vladimir Putin, qarşılığın tağın da arttırıp, ägär dä Waşington qalqan tözü planınnan baş tartmasa, Mäskäw üz raketaların Yevropağa taba boraçaq, dip belderde, ul oçraqta "böten xalıqara iminlekkä qurqınıç yanıyaçaq", digän ide Putin.

Kiçä kiç Rusiä häm AQŞ prezidentları kiçke aşta qısqa ğına söyläşep alğan, bu xaqta bez sammit eşen yaqtırtqan Azatlıqnıñ rus redaksiäse xäbärçese İrina Laguninadan beldek.

"Qısqa ğına söyläşü tınıç buldı, ämma annan alda Yevropa Komissiäse citäkçese Jose Manuel Barroso, Kremlneñ Rusiäneñ atom raketaların Yevropağa boru ixtimalı turında yal könnäre yasağan belderüe – qabul itelerlek tügel, bu çınbarlıqtan yıraq, salqın suğışnı xäterlätkän iske süzlär dide Barosso.."

Bügen jurnalistlar aldına çığıp AQŞ prezidentı Bush, Rusiäne tınıçlandırırğa tırıştı:

"Rusiä häm rusiälelär salqın suğışnıñ betkänen añlarğa tieş, bu möhim. Rusiä – AQŞnıñ doşmanı tügel, bez bik küp ölkädä xezmättäşlek itä alabız, misal öçen İran – atom qoralın cäyeldermäw ölkäse."

Fivral ayında Rusiä prezidentı Putin, Bush administrasiäsen dönyada üz ixtiyarın cäyelderüdä ğäyepläp çıqqaç ike citäkçeneñ oçraşqanı yuq ide äle.

Kiläse ayda Bush Putinnı Amerikada qabul itäçäk. İke aradağı iñ qatlawlı mäsälälär näq şul söyläşügä qalır dip farazlana.
XS
SM
MD
LG