Accessibility links

якшәмбе, 11 декабрь 2016, Казан вакыты 05:08

Xalıqara kongress tatarça ütäçäk


Bötendönya mirası şähärläre oyışmasınıñ IX Bötendönya kongressı bıyıl Qazanda uzaçaq iñ möhim waqiğalarnıñ berse. 2000 yılda Qazannıñ Kremle' tarixi-arxitektura kompleksı YUNESQO Bötendönya mirası isemlegenä qabul itelüe bik küp möselman illärenä dä mondıy çaralarda qatnaşırğa därt östägän. Qazanda ütäçäk kongressqa 66 ildän 174 şähärdän, şul isäptän 27 il başqalası wäkilläre qatnaşırğa teläk beldergän. Kongress Qazan häm Bötendönya mirası şähärläre oyışması tarafınnan ütkärelä häm Getti isemendäge Häykällär saqlaw institutı eşlägän programmanı üz eçenä ala. Bötendönya mirası şähärläre oyışmasınıñ IX Bötendönya kongressınıñ tatarlar öçen iñ möhim yañalığı- anıñ ingliz, fransuz, ispan, rus telläre belän berlektä, tatar telenä dä sinxron tärcemä itelüe. Biş tel nigezendä, şul isäptän tatar telendä dä, töp dokladlar buyınça biş törkemdä fiker alışu uzaçaq.

Şähär Duması başlığı urınbasarı Lyudmila Andreewa äytkänçä Korston kunakxanäsendä ütäçäk bu forumda plenar utırış häm biş seksiägä bülenep iñ möhim mä’sälälärne ayırım tikşerü oyıştırılaçaq. Şul seksiälärneñ iñ möhime, iñ qızıqlısı qaysı bulır digän soraw tua. Küplär öçen, bilgeräk tä tatarlar öçen M.Gosmanov citäklägän seksiädä miras häm iqtıysad mä’sälälären tikşerü bulaçaq. Akademik M.Gosmanov monda qatnaşuçılarnıñ häm çığış yasawçılarnıñ äzerlegenä iğtibar itte. Älege kiñäşmägä şähär xaqmiäteneñ milli bülek mödire İrek Arslanov, tatar kongress citäkçese Rinat Zakirov, Gumanitar universitettan R.Camaliev, Fail' Äxmädiev, Däwlät Sovetınnan Söläyma Raximovlarnıñ qatnaşuı oçraqlı tügel. Bu seksiädä törle däwlät wäkilläre qatnaşsa da ul tatar telendä alıp barılaçaq, ä başqa tellärgä tärcemä turıdan-turı tatar telennän bulırğa tieş. Bu üzençälek turında şähär xakimiäteneñ millätlär bülege xezmätkäre Gölnaz İsmägıylova söyli:

Bıyıl Qazanda berençe tapqır Bötendönya mirası şähärläre oyışmasınıñ IX Bötendönya kongressı ütkärelä. Bu ber söyeneçle xäl bulsa, ikençe söyeneçle xäl- kongress uzaçaq töp biş tel arasına däwlät tele bularaq tatar teleneñ dä kerüe. Anda bötendönya külämendä ütkärelä torğan kongressnıñ utırışı tatar telendä ütkäreläçäk. Şuşı çaranı uzdıru öçen törle ğalimnär, däwlät eşlekleläre cıyılıp äzerlek alıp baralar. Bu utırışnı bilgele ber däräcägä kütärü öçen alar üz tırışlıqların quyalar.

Qazan şähär xakimiäteneñ millätlär bülege xezmätkäre Gölnaz İsmägıylova tikşereläçäk dürt dokladnıñ da tezisların kiñäşmädä qatnaşuçılarğa tarattı. 66 däwlät, 174 şähär wäkilläre qatnaşlığında ütäçäk kongressta häm anıñ seksiälärendä tatar milläte, tele turında tügel, ä miras, iqtisat turında süz barsa da çaranıñ räsmi telläre arasında tatar tele tulı xoquqlı bulaçaq. Ä seksiälärneñ bersendä tatar tele berençe urında bulsın öçen äzerlek äle ük başlanıp kitte.

Elmıra Gazızova

XS
SM
MD
LG