Accessibility links

Boris Nemtsov - Rusiä berdäm däwlät bulırğa tieş


Rusiädäge Uñ köçlär berlege partiäse citäkçelärennän berse, elekke vitse-premyer Boris Nemtsov, Rusiä berdäm däwlät bulırğa tieş, anda Tatarstan kebek territorial'' moxtariät öçen urın yuq dip isäpli. 11-nçe yündä Boris Yeltsin çorınıñ kürenekle wäkillärennän sanalğan şuşı säyäsätçe Azatlıq radiosında bulıp kitte. Bezgä birgän äñgämäsendä Nemtsov, üzeneñ tatarlar belän bäyläneşe elektän ük nıq buluın äytep, "xätta qızım da öleşçä tatar" dip beldersä dä, Tatarstan möstäqillegen andağı törkemnär milek bülü öçen genä qullana, dide.

Azatlıq radiosında Tatar-başqort redaksiäse dä buluın belgäç, Nemtsov äfände şunda uq, üzeneñ tatarlar belän bik tığız bäylängäne, berençe xatınıñ da yartılaş tatar buluı, häm şul nikaxtan tuğan qızlarınıñ tatar tamırları belän bik qızıqsınıp Qazanğa barıp qaytuı turında söyläde.

Boris Nemtsovnıñ tatarlarğa, bigräk tä tatar däwlätenä mönäsäbäte alay da beraz qatlawlıraq bulıp çıqtı, häm bez äle moña tuqtalırbız. Ä xäzer isä anıñ Rusiädäge Uñ köçlär berlege wäkile ikänen istä totıp, şundıy soraw - bu partiä ähelläre, Nemtsov äfände üze dä, 90-nçı yıllarda Rusiä xökümäten citäkläde, üzençä reformalar başlap cibärde, ämma xäzer isä anıñ xökümättä tügel, Dumada da üz deputatları yuq.

Putin alğan xoquqlarnı kire qaytaru - Uñ köçlär Berlege kiläse saylawlarğa şuşı şiğar belän barmaqçı. Azatlıq radiosınıñ, Putin äle tatarlarnıñ latinğa küçü xoquqın da aldı, digäç, Nemtsov, bu beraz başqa mäs''älä dip, Mäskäw säyäsätçelärenä xas bulğança, milli problemalarnıñ möhimlegenä ällä ni zur iğtibar birmäwen kürsätte. Kürenekle uñçı säyäsätçe İrina Xakamada, misal öçen, ğomumän, millätlärneñ üzbilgelänü xoquqı zararlı prinsip, anı bötenläy beterergä kiräk, dip isäpli. Boris Nemtsov ta bu ölkädä añardan yıraq kitmägän bulıp çıqtı, ul Rusiädä tufraqlı, territorial'' moxatriätkä qarşı çığuın, barı tik mädäni moxtariätne genä qaldırunı kiräk dip tabuın belderde.

Boris Nemtsov şulay itep tatarnıñ üz däwlätçelegen qoru omtılışın, milli elitanıñ üzenä milek alu öçen qullanğan ber qoral itep kenä kürä. Tatar milli xäräkäte wäkilläre moña, näq menä şuña, milli däwlätçelekkä omtılışnı şulay tar añlawı säbäple, Uñ Köçlär Berlegeneñ Tatarstanda abruyı yuq ta, dip belderä.

Kärim Kamal
XS
SM
MD
LG