Accessibility links

Кайнар хәбәр

Semberneñ Yaña şähärendäge Sabantuy üzençäleklärgä bay buldı


Berençese – İdelaryağı rayonı başlığı Vladimir Nikolayıvnıñ qarşı töşüe. Säbäplären dä tapqan: 12-iyündä - Rusiä könendä Sabantuy kileşmi, imeş. İkençe säbäp: änä çuaşlarnıñ ölkä üzägendä ber genä Aqatuyı, ä nigä tatarnıqı ikäw bulırğa tieş? 16сында ölkäneke bulaçaq bit – şul citkän. Şuña da qaramastan, Yaña şähärneñ abruylı maltabarları basımı astında fatixa birergä mäcbür bulğan. Mondıy qapma-qarşılıqnıñ faydası da buldı: bäyräm räsmi açıştan, yäğni buş çığışlardan qotıldı. Sabantuynı İdelaryağı rayonı avtonomiäse räise Rafail Näcmetdinov açıp cibärde. Çığışınıñ töp mäğnäse – Yaña şähärdä bıltır ğına açılğan mäktäpkä balalar tuplaw möhimlege. Çönki, dide ul, ägär bıyıl da 225 bala tuplanmasa, rayon xakimiäte anı yaptıru belän yanıy. Şunlıqtan Rafail äfände berençe süzne mäktäp direktorı Älfiä Abutdinovağa birde. Älfiä xanım, tabiği inde, mäktäpneñ uñışları turında süz tottı häm balalarnı şunda uqırğa birüneñ uñay yaqlarına iğtibar yünältte. Annan soñ mäktäpneñ 1-sıynıfına cıyınuçı 6 yäşlek Zifa çıqtı. Anıñ Sabantuy turındağı cırlawı häm matur itep şiğer söyläwe küplärne soqlandırdı. Mäktäp uquçıları Liliä Yosıypova häm Läysän Xäyrullina ana tele häm tatar yazmışı, anıñ kiläçäge turında mäşhür şağirlärebez äsärläre belän çıqtılar. Mäğnäse şul uq: tatarnıñ kiläçägen saqlap qalu öçen ana teleneñ möhimlege. Alarnıñ çığışları da yäştäşlären şuşı mäktäpkä öndäwdä yañğıradılar. Başqa balalar çığışları da şul uq yünäleştä äzerlängän ide. Urman çitendä “Tatar mäktäbe sezne kötä” digän transparant astındağı östäldä 2 uqıtuçı ğarizalar qabul itep utırdılar. Älfiä xanım äytüençä, 7 ğariza birgännär. Ämma küpçelek älegä uylana, dide ul. Yaxşıraq uylansınnar öçen, “Tuğan tel” aktivistları, säxnädän notıq belän çiklänmiçä, ügetläw eşe alıp bardılar. İñ ışanıçlısı: uqıtuçılar tügel – kürşelär, duslar ügetläwe. Şunlıqtan küplärgä ügetläw käğäzläre öläşelde. Sabantuynıñ tağın ber üzençälege – yarışlarnıñ küpçelegendä nänilärneñ qatnaşuı. Qapçıqta, su tulı çiläkçek belän, qulğa totqan qaşıqtağı yomırqa belän yögerüme, qayçı belän büläklär kisüme, bağanağa menü häm başqa tör fizkul'tura yarışlarımı – nigezdä, balalar öçen oyıştırılğan ide. Häm monı mäktäpkä cälep itü genä tügel – milli bäyrämebezneñ tämen iñderü dip tä qabul itärgä buladır. Döres, ölkännär öçen dä törle yarışlar oyıştırılğan ide. Ämma, añlaşıla inde, iğtibar üzägendä – milli köräş. Ğädätkä kergänçä, här awırlıq töre buyınça üz batırları açıqlandı. Ä absolyut batır isemenä Räşit Nizamov layı buldı. 2-nçe urında – çuaşlarnıñ Mäskäwdä uzğan köräşe çempionı Denis Sentnerov. Öçençe – Mönir Väliev. Absolyut batırğa televizor büläk ittelär. Bulaçaq ölkä Sabantuyında maşina büläk itmäkçelär. “Aq bars” bankınıñ Ul'yan filialı citäkçese Nuriä Mäcitova bäyrämgä 25 meñ rubl' aqça birgän, läkin Sabantuy batırına maşina büläk itüne önämi ul. Yaña şähär bäyrämen oyıştıruğa zur öleş kertkän maltabarlar da şundıy uq fikerdä. Moña menä nindi nigezläwlär kiterälär. Qimmätle büläklär Sabantuynıñ milli yözen yuğalta, baylıq quunı tormışnıñ töp maqsatı itep qabul itü ğädäte tamır cäyde, mondıy şawqımğa, içmasa, milli bäyrämebez yärdäm itmäsen ide. Milli köräşneñ käsepkä äylänüe dä xäwefländerä. Bu modanıñ tamır cäyuenä, bälki, maşina bäyäsen üzara büleşü mömkinlege dä etärgeç biräder. Süz soñında älege Sabantuynı Qazan qunaqları Mäwlidä häm İlsur Mortazinnar da bizägänen äytep ütü kiräkter. Ayrat İbrahim, Sember
XS
SM
MD
LG