Accessibility links

җомга, 2 декабрь 2016, Казан вакыты 23:03

Ğiraqta şığılarnıñ izge mäçeten şartlatu kөç qullanunıñ artu qurqınıçın tudıra


Ğiraqnıñ Sämärrä şähärendä sönni ğisyançılar dip şiklänelüçelär şığıylarnıñ izge törbäsendäge mäçetneñ ike manarasın şartlattı. Bu höcüm Ğiraqtağı mäzhäbara bäreleşlärne tağın da köçäytergä mömkin.

Politsiä äytüençä, Sämärrädäge Äl-Äskäri mäçeteneñ 2 manarası cimerelügä şartlatqıçlar säbäp bulğan.

Mäçetneñ zur altın gömbäze 2006-nçı yılnıñ fevral ayında şartlatılğan ide. Ul höcüm öçen äl-Qaidägä bäyle dip isäplänelgän sönni suğışçılar ğäyeplände.

Şul höcümnän soñ Ğiraqta meñnärçä keşeneñ ğömeren özgän, distälärçä meñ keşene öylären taşlap kitärgä mäcbür itkän mäzhäbara bäreleşlär başlanıp kitte.

Şuña kürä bügen bu kürenekle mäçetkä yaña höcüm sönnilär belän şığıylar arasındağı bäreleşlärne tağın ta köçäytep cibärä ala digän borçularğa säbäp bula.

Bügenge höcümnän soñ açulı xalıq mäçet yanına cıyıldı

Premyer ministr Nuri äl-Mäliki kiçekmästän Ğiraqtağı AQŞ xärbi citäkçese general David Petraeus belän oçraşıp Sämärrädä bäreleşlär başlanuğa yul quymas öçen anda östämä köçlär cibärüne soradı.

Däwlät televideniesendä çığış yasap äl-Mäliki ğiraqlılarğa barlıq ğibadätxanälär yanında iminlek çaralarınıñ köçäyteläçägen häm bügenge höcümneñ nıqlap tikşereläçägen belderde.

Äl-Mäliki şulay uq ğiraqlılarnı tınıç bulırğa çaqırdı.

"Min barlıq watandaşlarğa häm möeminnärgä möräcäğät itäm häm dini citäkçelärne, xakimiätlärne xalıqnı tınıçlıqqa çaqırırğa öndim. Bolğançıq suda balıq totuçılarğa, bu cinayättän säyäsi fayda alırğa tırışuçılarğa yul quymaw öçen saq häm aqıllı eş itärgä çaqıram. Min şulay uq bolğançıq suda balıq totuçılarnı milli tatulıq xökümätenä häm anıñ xoquqıy nigezenä zıyan kitermäskä çaqıram" dide äl-Mälili.

Däwlät televideniese şähärdä waqıt belän çiklänmägän kommendatn säğäte kertelüen belderde.

Radikal şığıy din ähele Moqtada äs-Sadr 3 könlek matäm iğlan itte häm manaralar cimerelügä rizasızlıq belderü öçen tınıç demonstratsiälärgä çaqırdı.

Ğiraqtağı şığıylarnıñ baş citäkçese Ayatulla Ali äs-Sistani da üz süzçese aşa xalıqnı tınıçlıqqa çaqırdı.

Bu mäçettä Ğiraq şığıyları öçen iñ izge 4 törbäneñ berse urnaşqan. Häm anda 9-nçı ğasırdağı 2 imam cirlängän.
XS
SM
MD
LG