Accessibility links

шимбә, 10 декабрь 2016, Казан вакыты 19:38

Xämas Ğizzä Sızığın üz qaramağına aldı


Atna buyı däwam itkän üzara bäreleşlärdän soñ suğışçan Xämas törkeme Ğizzä Sızığın üz qaramağına aldı. Zamanında Yassir Arafat citäklägän Fätah xäräkäte suğışçıları annan çigenergä mäcbür buldı. Fälestinlelärneñ küpçelege yäşägän Könbatış Yar Fätax qaramağında qaldı. Şulay itep xäzer fälestinlelär ike cirdä bülenep qalğan bulıp çığa.

Fälestinlelärneñ möstäqil däwlätkä iä bulu xıyalı äle berqayçan da bu qädär yıraq bulıp kürenmägänder.

Islamçı Xämas yözdän artıq keşeneñ ülemenä kitergän bäreleşlärdän soñ Ğizzäne üz kontrolenä aldı häm töp iğtibarın Ğizzägä yünältä.

Könbatış Yar isä Fälestin Idaräse prezidentı Mäxmüt Ğabbasnıñ Fätah xäräkäte qaramağında qala

Atnakiçtä Ğabbas Ğizzädä ğädättän tış wäzğiät iğlan itte häm 3 ay elek tözelgän, Fätah belän Xämasnı üz eçenä alğan fälestin urtaq xökümäten kire qaqtı. Bu turıda Könbatış Yardağı Ramalla şähärendä Ğabbasnıñ ölkän yardämçese Tayib Ğäbdräxim iğlan itte.

"Bez Ğizzädäge cinayätçel suğış, fälestin idaräseneñ iminlek oyışmaları idarälären basıp alular häm fälestin qanunnarınnan tış eş itüçe qorallı suğışçılarnıñ xärbi fetnäse säbäple barlıq fälestin cirlärendä ğädättän tış wäzğiät iğlan itäbez" dide Ğäbdräxim.

Fälestin räsmiläre äytüençä, Ğabbas Parlamenttağı bäysez äğza, moñarçı finans ministrı bulğan Sälam Fayyadnı ğädättän tış wäzğiät xökümätendä premyer minsitr wazıyfasına saylağan.

Premyer ministr, Xämas wäkile Ismail Xäniä Ğizzä şähärennän moña tiz genä üz cawabın birep Ğabbasnıñ süzlärenä iğtibar itmäskä çaqırdı.

"Xäzerge xökümät üz wazıyfaları häm burıçların ütäw öçen mömkin bulğança tırışaçaq häm fälestin xalqı aldındağı milli häm äxlaqıy cawaplılıqtan cigenmiäçäk" dide Xäniä.

2007 yılnıñ ğinwarındağı parlament saylawlarında Xämas ciñep çıqqannan soñ könbatış fälestinlelärgä finans yardämen tuqtattı. Şul uq waqıtta Izrail Fälestin Idaräsenä tapşırılırğa tieşle 500 million dollardan artıq salım aqçaların totıp qaldı.

Xämas üzeneñ maqsatı itep Izrailne yuq itüne quya. Quşma Ştatlar, Izrail häm Yewropa Berlege Islamçı Xämas xäräkäten terrorçı oyışma dip sanıy.

Atnakiçtä Waşingtonda AQŞ däwlät departamentı süzçese Sean McCormack monı tağın ber märtäbä qabatladı.

"Xämas terrorçı oyışma. Bez Xämas äğzaların terrorçı oyışma äğzaları dip isäplibez häm bu üzgärmäde" dide.

Izrail häm AQŞ räsmiläre Ğizzägä çikläwlärne däwam itep Ğabbasnı yaqlaw öçen Könbatış Yarğa aqça cibärü mäsäläsen qaraw mömkinlege turında belderä.

Xämasnı isä Iran belän Süriä yaqlıy. Häm Xämasqa Mısır belän Ğizzä cige aşa qoral häm başqa yardäm cibärelä dip isäplänelä.

Mısır räsmiläre äytüençä, Yaqın Könçığış protsessında aradaşlıq itüçe, fälestinlelär yaqlı Mısır Xämasnıñ Fätahnı Ğizzädän köç belän bärep çığaruına protest yözennän Ğizzädäge üz wäkillären dä çaqırtıp alğan.
XS
SM
MD
LG