Accessibility links

җомга, 9 декабрь 2016, Казан вакыты 12:58

Fälestinnär ikegä bülende: yaña xökümät bilgelänä


Bügen Fälestin xakimiäte prezidentı, ğäräp illäre häm könbatış tarafınnan yaqlanğan Mähmüd Ğabbas yaña xökümätne bilgelärgä tieş. Ämma anıñ xakimiäte xäzer yılğanıñ Könbatış Yarında ğına bula ala, çönki Ğizza Sızığı – köndäş Hämäs törkeme kontrolendä. Hämäs Fatah belän bergä eşlärgä täqdim itkän, ämma Ğabbas täqdimne kire qaqqan digän xäbärlär bar.

Pänceşämbe 14 yün könne Mähmüd Ğabbas, Hämäs premyer-ministrı İsmail Häniä citäkçelegendäge xökümätne taratıp, ğadättäntış xökümätne cıyu eşen elekke finans ministrı Säläm Fayyadqa quşqan ide. Fayyadnıñ yaña premyer-ministr buluına Hämäs qarşı çıqtı.

Alay da Hämäsneñ Dämäşktä yäşäwçe yulbaşçısı Xaled Meşaal, kiçä, Hämäs Ğabbasnı qanunlı prezident itep tanıy häm anıñ belän xezmättäşlek itergä äzer, dip beldergän ide. Hämäs fälestin cirlärendä xakimiätne büleşergä teli, dide Meşaal:

"Hämäsneñ xakimiätne üz qulına alu niäte yuq. Ğizzädäge xällär – kemneñder üz xakimiäten barısına da yöklärgä omtılışınıñ näticäse buldı."

Ämma Fatah Hämäs belän bu mäsädä nindi dä bulsa söyläşülär mömkinlegen kire qaqtı. Ğabbasnıñ yaqın kiñäşçese Ähmäd Ğäbdelräxmän, Äl-Cäzirä televideniäsenä, " fetnäçelär belän söyläşü bulmayaçaq" dip belderde. Ğizzädä köç qullanuda 400läp keşe häläk buldı, 900dän artığı yaralandı.

Yaña tözelgän xökümät Könbatış Yarda idarä itäçäk, anda fälestinnärneñ küpçelege yäşi. Ğizzä isä xäzer Hämäs köçläre kontrolendä.

Comğa könne Qahirädä cıyılğan Ğäräp Ligasına kergän 22 ilneñ tışqı eşlär ministrları Ğabbasnı, ämma ber ük waqıtta küpçelekne Hämäs deputatları täşkil itkän fälestin parlamentın da yawlawların belderde:

"Bez fälestin qanunnarın yaqlıybız, bez prezident Abu Mazen, yağni Mähmüd Ğabbasnı yaqlıybız, bez saylanğan fälestin qanunçığaru şurasın yaqlıybız, bez fälestin oyışmaların yaqlıybız."

Fälestin cirlärendä köç qullanu artqan ber mäldä, finans yardäm dä äzerlänä, hiç yuğı aqça Könbatış Yardağı yaña xökümätkä barıp ireşer dip farazlana.

AQŞ häm Yevropa Berlege Hämäsne terror oyışması dip sanıy, häm Hämäs parlament saylawlarında ciñgännän birle fälestin xamiätenä turıdan turı yardäm bulmadı, barı tik fälestin xalqına humanitar yardäm genä cibärelde. Xäzer, Waşington, İzrail häm Yevropa illäre Ğabbasnıñ yaña xökümätenä yardämne yañartırğa cıyına. İzrail tışqı eşlär ministrı Tzipi Livni, fälestinnär arasında watandaşlar suğışı İzrailgä kiräk tügel, dip belderde.

Haifada yäşäwçe belgeç Ämir Maxul, Könbatışnıñ Fatahnı bolay yaqlawı häm bu mäsälädä ğäräp illärenä basım yasawı – fälestin nizağın tağın da tiränäytä ala, dip farazlıy:

"Amerika Mısır, Ürdüngä basım yasıy, häm bu bik qurqınıç. Min xäzerge waqıtta – mömkinleklärgä qarağanda, monıñ qurqınıçı zurraq dip sanıym. Bu fälestinnär faydasına tügel, alar başqa törle tormış kürergä teli, alar totrıqlılıq, iminlek, aşarğa rizıq häm abruyların kürergä teli."

Nizaqnı İran häm Süriä qızdırıp tora dip sanawçılar da bar. Belgeçlär arasında – fälestinnär axırğı çiktä barıber berläşergä tieş bulaçaq, ämma axırı yaxşı tämamlanğaçığa qadär, xällär tağın da naçarraq bulırğa mömkin digän farazlar da bar.
XS
SM
MD
LG