Accessibility links

шимбә, 10 декабрь 2016, Казан вакыты 13:53

İran: Mäskäw wäğdä itte, radar Azärbaycanda bulmayaçaq


Mäskäw, Iran tışqı eşlär ministrlığına, AQŞqa Azärbaycandağı radar qorılmasın qullanırğa röxsät birmiäçägen wäğdä itkän. Bu xaqta İran belderde. Bolay bulğaç, Rusiä prezidentı Vladimir Putinnıñ AQŞ ilbaşı Bushqa yasağan täqdime närsäne añlata?

Tähranda 17 yün könne matbuğat oçraşuına kilgän jurnalistlarnı İran tışqı eşlär ministrlığı matbuğat wäkile Möhämmäd Ali Hösäini şaqqatırdı. Anıñ süzlärenä qarağanda, Kreml İranğa, Azärbaycandağı Qarbala radar bazasın amerikannarğa birmäskä wäğdä itkän. Döres bulıp çıqsa, bu – Putin täqdimenä qarşı kilä. Putin Bush belän bulğan oçraşuda, Çexiädä yaña radar cihazı tözegänçe, Waşingtonğa Azärbaycandağı bazanı qullanu qulayraq bulır dip beldergän ide.

AQŞ raketa qalqanın İran häm Tönyaq Koreadan saqlanu öçen tözergä cıyına. Mäskäw, qalqannı Yevropada urnaştıruğa qarşı, çönki cihazlar Rusiä raketaların küzätäçäk, dip belderä.

Putinnıñ Qarbala bazasın täqdime töbendä – AQŞnıñ İrannı küzätüe, alar belän bergä eşlägän Rusiä xärbiläreneñ isä AQŞ eşçänlegen küzätü niäte yata.

Şotlandiä Universitetınıñ İrannı öyränü bülege belgeçe Peter Lehr, Putin täqdimeneñ citdi buluına ışanmıy. NATOğa kermägän il köçläre NATO äğzase iminlege öçen cawaplı bula almıy, di ul:

"Azärbaycandağı ul qorılmanı küz aldığızğa kiteregez. Azärbaycannar, ruslar häm amerikannar bergä eşliäçäk. Eşne oyıştıru yağınnan bu qotoçqıç bulaçaq."

Amerikan räsmiläre Putin täqdimen iminlek säbäplärennän kire qaqtı inde. Rusiä saqlanu ministrı Anatoly Serdyukov belän oçraşqannan soñ bu xaqta Brüsseldä AQŞ saqlanu ministrı Robert Gates belderde:

"Min oçraşuda qatği itep äyttem, bez radarnı Çexiädä tözü eşen däwam itäçäkbez."

İrannıñ bu belderüen Rusiä raslamadı. Putin, bu süzlärne, AQŞ Rusiä täqdimen kire qaqtı, dip äyter öçen yasadı, diä alır ide, di belgeçlär. Azärbaycannıñ elekke iminlek kiñäşçese Wafa Quluzade, uzğan atnada Azatlıq radiosına, Rusiä anıñ tormışqa aşa almayaçağın belep äytte, dide:

"Putin ul täqdimne, AQŞ Azärbaycanda radar quyarğa telämägänen belep yasadı."

İrannıñ bügenge köndä Quşma Ştatlarğa barıp citärlek raketası yuq. Qayber belgeçlär süzlärenä qarağanda, İrannıñ iñ yıraqqa, 1300 çaqrımğa oça alğan Şahab-3 raketası Könçığış häm Könyaq Yevropa, şulay uq könyaq Rusiägä citä ala.
XS
SM
MD
LG