Accessibility links

Кайнар хәбәр

Qazanda töbäk häm milli mäğlümät çaraları kongressı tämamlandı


Uzğan atnada respublikada Milli häm töbäk mäğlümät çaralarınıñ kongressı ütte. Bıyıl ul inde 3 märtäbä oyıştırıldı. Kongress qısalarında Kul’tura v efire – Efirda mädäniät festivale dä uzdı. Töbäk häm milli mäğlümät çaraları kongressı Rusiäneñ 50dän artıq töbägennän wäkillärne cıydı. Alay ğına da tügel, çarada Baltiä häm BDB illäre jurnalistları da qatnaştı. Çarağa mäğlümät çaraları wäkilläre genä tügel, ä ictimaği oyışmalar citäkçeläre, Rusiä parlamentı deputatları, teleradiokompaniä citäkçeläre dä bar ide. Kongressnıñ eşe nigezdä korab ta bardı. Şuña da kongressqa cıyıluçılar qazan belän genä tanışıp qalmadı, ä respublikanıñ başqa cirlärendä dä bula aldı, Tübän Kamada uzğan sabantuyda qatnaştı, Alabuğa belän tanıştı. Älege cıyın qısalarında uzğan çaralarğa kilsäk, bıyıl alar bik qızıqlı häm eçtälekle buldı, digän fikerdä tora kilgän qunaqlar. Bu xaqta bezgä kongressta qatnaşqan Azatlıq radiosı xäbärçeläre, Omski teleradiokompaniäseneñ Säläm tapşıruı jurnalistları Saniä Mirxalieva häm Rozaliä Sayganova söylädelär.

Uzğan yıl belän çağıştırğanda kongress bigräk tä yaxşı oyıştırılğan ide. Küpsanlı fiker alışular, tanılğan jurnalistlar belän oçraşular, alarnıñ däresläre bik küp närsä birde bezgä. Praktik eşlär belän dä şöğelländek Oyıştıruğa kilgändä dä, bar närsä bik äybät uzdı, bıyılğısı uñışlıraq ütte. Annarı tağı ber üzgäreş – bez törle jurnalistlarnıñ eşlären qarap, alar xaqında fikerläşep, tikşerä aldıq

Xäyer, kongress eçtälekle, möhim çaralarğa bik bay bulsa da, anda milli mäğlümät çaraları, alarnıñ problemalarına ällä ni iğtibar bulmağan ikän. Çaqırılğan qunaqlar arasında da milli mäğlümät çaraları wäkilläre, bigräk tä tatarlar, ayıruça az ide. Şuña da, Saniä Mirxalieva da, Rozaliä Sayganova da kiläse kongresslarda milli mäğlümät çaralarına iğtibar kübräk bulsın ide, digän teläk belderä.

Şunısın da äytergä kiräk, Azatlıqnıñ Omskidağı xäbärçeläre kongress qısalarında ütkärelgän bäygeneñ ciñüçeläre dä buldı. Alarnıñ Säläm programması radiotapşırular arasında berençelekne yawladı. Ä menä Yekaterinburdan Fawiä Safiullina tarafınnan töşerelgän dokumental’ fil’m maxsus televizion programmalar nominatsiäsendä berençelekne aldı.

Gölnaz İlgizär

XS
SM
MD
LG