Accessibility links

дүшәмбе, 5 декабрь 2016, Казан вакыты 15:33

Ğiraqta yaña xärbi çara: köç qullanu qaçaqlar sanın arttıra


Bağdadtan tönyaqqa taba AQŞ häm Ğiraq köçläre maxsus xärbi çara başladı. Çaranıñ maqsatı – täbäktäge sönni ğısyançılar häm Äl-Qaida suğışçıların yuq itü, moña meñlägän ğaskär cälep itelgän.

Xärbi çara bügen tañ atqanda Diyala vilayätendä başlandı. Başqala Bağdadtan tönyaqqa taba 60 çaqrım yıraqlıqta urnaşqan Baquba şähärendä hawa häm cir öste xärbi höcümnäre yasaldı. Diyala kampaniäse – ğısyançılarnıñ taktika üzgärtüenä koalisiä köçläre cawabı dip bäyälänä.

Bağdadta kontrol çağıştırmaça yaxşı, äl-Anbar vilayäte dä AQŞ ğaskärläre kontrolendä, ğısyançılar şuña kürä höcümnär öçen ilneñ başqa ölkälären saylıy, dip xäbär itä AQŞ xärbi citäkçelege. Uzğan çärşämbe könne Pentagon äzerlägän xisapta suğışçılarnıñ Diyalağa tuplanuı – Ğiraq üzäge öçen qurqınıç, dielgän ide. Soñğı aylarda biredä sönni ğaräp suğışçıları tuplandı, şulay uq şığı ğısyançıları da bar. Diyala vilayäte – awıl xucalığı üzäge, biredä iñ zur xörmä häm äflisün urmannarı urnaşqan, biredä sönnilär belän bergä şığılar da yäşi. Mäsxäbara bäreleşlär başlanğannnan birle meñlägän keşe öylären taşlap kitergä mäcbür buldı. Soñğı xäbärlärdän işetep torasız, xörmätle tıñlawçılar, Ğiraqta höcümnär ber Diyala vilayätendä genä tügel, könenä berniçä tapqır ilneñ başqa töbäklärendä dä bulıp tora. Könyaqtağı Basra, şulay uq Mosul häm Tal Afar şähärlärendä köç qullanunıñ artuı küzätelä. Dimäk qaçaqlar sanı da arta.

20 yün – qaçaqlar köne. BMO qaçaqlar idaräse mäğlümatlärenä qarağanda, uzğan yıl dönyada qaçaqlar sanı Ğiraqta barğan suğıştan kitüçelär xisabına ğına 14%qa artqan. Barlığı 2 million 200 meñnän artıq ğiraqlı xäzer çit illärdä. 1 yıl eçendä genä Ğiraqtan million yarım keşe kitkän, alarnıñ kübese Süriä häm Ürdündä. Äfğanstannan da xalıq küp kitte. İñ küp qaçaqnı Paqstan qabul itte, qalğannarı İran, Amerika Quşma Ştatları häm Germaniädä.
XS
SM
MD
LG