Bıyelnıñ 16- aprelendä Çallı şähär mäxkämäse R.Kaşapovka ruxi zıyan öçen 200 meñ sum aqça tüläw turında qarar çığarğan ide. Älege mäxkämä eşennän soñ şunısı küzgä taşlana, räsmi xakimiät gazetaları distä yıllar buyına R.Kaşapov xaqında yazmasalar, xäzer aña qarata iğtibarnı köçäyttelär. "Şähri Çallı" gazetası, mäsälän, "Millätpärvär bulu ciñel tügel" digän mäqälä bastırdı häm anıñ kereş öleşendä jurnalist Rizidä Ğasıymova bolay di:
- Anıñ fikerdäşläre tatar dönyasında ğına tügel, Rusiädä, çit illärdä dä baytaq. Şul uq waqıtta yaratmawçılar, doşman kürüçelär dä bar. Yäşeren batırın tügel, üzebezneñ tatarlar arasında Rafisqa, "yöri inde şunda", dip, sarkazm belän qarawçılar citärlek. Läkin aña qarata mönäsäbät nindi genä bulmasın, ber närsä bäxässez - R.Kaşapov üze belän isäpläşergä mäcbür itä torğan şäxes. Çallı mäxkämäse xäkimiät orğannarınıñ zakonsız ezärlekläwläre näticäsendä yasalğan ruxi zıyan öçen Rusiä qaznasınnan Kaşapovka 200 meñ sum kompensatsiä tülärgä dip qarar çığarğan ikän, bu moña açıq misal,"- dip yazıp çıqtı "Şähri Çallı" gazetası.
Mäxkämä qararınnan soñ 2 aydan artıq waqıt ütte. Mäskäw älegä 200 meñ sumnıñ ber tienen dä birmägän. R.Kaşapov bu uñaydan "Azatlıq"qa mondıy añlatma birde:
- Xökem çığaruçı Rusiä kaznaçılığına xat cibärde. Älegä cawap kilmäde. Şulay da aldağı 1-2 ayda ruxi zıyan öçen bireläçäk aqçanı alırbız, dip ömetlänäm.
Bilgele bulğança, sez qabattan mäxkämägä, bu yulı madti zıyannı tülätü öçen möräcäğät itkänsez.
- Äye, bez madti zıyannı 250 meñ sum dip bäyäläsäk tä, qulda bulğan çığım dokumentları 82 meñ sumlıq qına cıynaldı. Ä bolay aqça bu summadan kübräk totıldı. 26нче iyündä şuşı mäxkämä eşe başlanaçaq.
R.Kaşapov mondıy fikeren dä äytte:
- Minem kürgännärem belän çağıştırğanda tülänäçäk aqça az. Läkin eş kompensatsiäneñ külämendä genä tügel bit. Mäs’äläneñ moral' yağı da bik möhim. Bezneñ ildä säyäsi totqınnarnı aqlaw, alarğa kompensatsiä tüläw oçraqları bik siräk bulğan.
Çallı, Ğafiulla Ğaziz
