Accessibility links

сишәмбе, 6 декабрь 2016, Казан вакыты 08:59

Qazanda küñel açu üzägeneñ tüşäme cimerelsä, Teläçä östennän dawıl uzdı


Berniçä kön eçendä genä möxtäräm tıñlawçılar, Tatarstanda berniçä ğädättän tış häm kötelmägän xäl bulıp aldı. 18 könne köçle yauğan yañğır yawıp Qazan metrosınıñ Tuqay mäydanı tuqtalışın su basqan ide. 20 iyün könne kiçen köçle dawıl Teläçä rayonındağı 10 lap awılğa zur zıyan saldı. Çärşämbe kiç isä Qazandağı säwdä küñel açu üzäge Park Housenıñ tüşäme cimerelep töşep ike keşe zıyan kürde. Ämma Park Housenıñ matbuğat üzäge bu qızlarğa zıyan kilmäde, alar meditsina xezmätkärläreneñ yärdämennän baş tarttı dip belderä.

Qazan metrosına kilgändä isä, yulçılar tubıqtan su yırıp yörügä qaramastan bu xälne metronıñ ekspluatatsiä bülege başlığı Färit Sibğätullin, bu ğädättän tış xäl tügel, ä ğädäti xäl dip añlatırğa tırıştı.

Sibğätullin äytüençä, bu xälne televizorda kürsätkän “Efir” kanalı, keşelärne dä evakuatsiälädelär dip, söyläp arttırıp cibärgän. Citäkçelek wäkile, bu xäl xalıqnıñ metroda yörüenä mısqal da tä'ssir itmäde, dip belderä. Su basqannan soñ Metroelektrotransnıñ baş injenerı Elmir Zakirov, Peterbur uramındağı yañğır ütkärgeç eşlämägängä şundıy xäl kilep çıqtı, dip beldergän ide. Ä mondıy xäl bulğan oçraqlarda eşkä kereşäse suırtu sisteması, tözek bulmağan. Ekspluatatsiä bülege başlığı tağın qatı yañğırlar bulsa, mondıy qurqınıç tuarğa mömkinme, digän sorawğa cawap birüdän baş tarttı. İnde xäzer cir astınnan çığıp, kükkä kütärelsäk, sişämbe kiç köçle dawıl Teläçä rayonı östennän ütte. Bu Tatarstan östennän uzğan berençe tabiğät qazası ğına tügel. Berençe dawıl Çüpräle rayonı östennän ütte. Ğadättän tış xällär ministrı urınbasarı Nikolay Surjko äytüençä, alarğa zur zıyan kilmägän. Ministrlıq tözeleş kiräk-yaraqları belän yärdäm itkän.

1 iyün könne Respublikanıñ 12 rayonı östennän uzğan dawıl kitergän zıyannı bu rayon citäkçeläre 500 million sum dip bäyälägän, di Surjko. Xakimiätlär birgän sannar çınbarlıq belän tikşerelä, dide ul. MÇS wäkileneñ tel töbennän añlaşılğança, mondıy oçraqlarda urındağılar qaza zıyanın küpkä arttırıp kürsätergä yarata. Ä rayon citäkçelege isä kürgän zıyannıñ ber öleşe öçen genä bulsa da aqça ala alsaq bik şat bulır idek, dip belderä.

Äytep kilmi ul. Annan kiläm, monnan kiläm, dip. Bez qorılmalarnı, basularnı, urmannarnı iminiyätläşteräbez bit inde. Anıñ şul straxovka aqçasın alsaq äybät inde. Küp waqıt birmilär dä anı şunda, di Teläçä rayonı başlığı urınbasarı Robert Ğäliäxmätov. Anıñ äytüençä, dawılnı alar küp oçraqta belmi dä qala. Ä Ğädättän tış xällär ministrı urınbasarı Surjko bez urındağılarnı härwaqıt kisätep torabız, dide.

Nail Alan

XS
SM
MD
LG