Accessibility links

Кайнар хәбәр

Tatarstanda tağı ber hawa şirkäte xezmät kürsätä başladı


Tatarstanğa qunaqqa kilüçelär soñğı yıllarda bermä-ber arttı. Respublika xalqı üze dä çitkä yörergä yarata başladı. Alarnıñ kübese, bigräk tä çit ildän kilüçelär häm şunda yalğa, räsmi säfärgä kitüçelär, yulnı oçqıçlarda ütüne xup kürä. Şuña, törle hawa yulları, yaña reyslar açıla xäzer Qazan hawa alanınnan. Alarnı xezmätländerüçe hawa şirkätlärneñ sanı da arta bara Tatarstanda. Şuşı könnärdä genä tağı ber aviakompaniä – KD avia kilde Qazanğa.

Ul inde üzeneñ berençe passajirların da yörtä başladı. Alar älegä küp tügel, nibarı 20 genä keşe ikän. Läkin aviakompaniä wäkilläre üzläreneñ Tatarstanda uñışlı eşläwenä şiklänmi. Kiläçäktä alar respublikada çit ilgä kitü öçen hawa yulları belän qullanuçılarnıñ 80 protsentın üzläreneñ reyslarına cälep itäçäk, dip ışana. Bu hawa şirkäte şaqtıy üzençälekle xezmät täqdim itä. Alar yärdämendä, Qazan hawa alanınnan Kaliningradqa oçıp, annan inde törle oçqıçlarğa küçep utırıp Evropa şähärlärenä barıp citep bula. Oçışlar Boing maşinalarında başqarıla. Älegä qazannan atnasına 4 reys buldırılğan. Kiläçäktä alarnıñ sanı 7gä citkereler, dip kötelä. Üzlärenä keşelärne KD-avia şirkäte biletlar bäyäseneñ arzanlığı belän cälep itmäkçe bula. Kaliningrad aviakompaniäse belän yaqınnanraq tanışıp kitsäk, ul 2002 yılda eşli başlağan. Älege hawa şirkäte Rusiä, Evropa, Afrika häm Yaqın Könçığışqa daimi häm çarter reyslar yasıy. Anda 20 Boing oçqıçı xezmät kürsätä.

İnde äytep kitkänebezçä, KD-avia yärdämendä Qazannan törle illärgä oçarğa mömkin. Şirkät hub&spoke sisteması buyınça eşlärgä niätli. Bu sistema nigezendä Rusiäneñ 10 şähäre 15 Evropa başqalası belän bäylänäçäk. Oçqıçlarğa küçenep utıru KD-avia nigezlängän Kaliningradnıñ Xrabrovo hawa alanında bulaçaq. Älbättä, bu eşlär bik küp aqça sarıf itüne taläp itä. İnde xäzer genä dä bez älege proyektnı tormışqa aşıru öçen 2,5 milliard sum aqça tottıq, di şirkät başlığı kiñäşçese İrina Korneva. Läkin çığımlı bulsa da bez bu eşkä totınırğa buldıq, çönki şundıy kiläçäkkä yünältelgän proyektlar nigezendä genä bez başqa töbäk aviaşirkätläre rätennän çığıp, üzebezne tanıta alaçaqbız, di Korneva.

Ä Tatarstanda inde eşläwçe hawa şirkätlärenä kilgändä, alar üzläreneñ yaña köndäşläre, alarnıñ proyektları xaqında nindi fikerdä tora soñ? Ğädättä tatarstanlılar çit illärgä oçqanda, Mäskäw aşa yul totunı qulay kürälär. Mäskäwgä Qazannan 3 aviakompaniä – S7, UTair häm Tatarstan aviaşirkäte yärdämendä oçıp bula. Şunısı da äytergä kiräk, Tatarstan – respublika hawa kompaniäse. Qalğan ikese – başqa töbäktän kilüçelär. Alarnıñ Qazannan oça başlawların iskä alsaq, oçqıçlarnı totqarlaw, reyslarnı waqıtında cibärmäw, Qazan aeroportı tarafınnan törle totqarlıqlar buldıru kebek ğämällärne dä iskä alıp bula. Monı belgeçlär Tatarstan tarafınnan üzeneñ aviaşirkäten yaqlaw dip bäyälägän ide. Läkin bolar barısı da inde tarixta qaldı. Xäzer S7 da, UTair da Mäskäwgä reysların problemasız başqara, 3 aviakompaniä öçen dä bügenge köndä oçuçılar tabıla.

Ä menä xalıqara reyslarnı qazannan turı barı tik Lufthansa aviakompaniäse ğına başqara. Aqçalıraq, mömkinlekläre buluçılar çit illärgä Qazannan Frankfurtqa oçıp, annarı inde üzlärenä kiräk cirgä kitüne qulayraq kürälär. Şuña da, KD-avianıñ reysları berençe qaraşqa näq menä alarğa köndäş bulır kebek. Lufthansanıñ Tatarstandağı bülekçäse citäkçese bu xaqta Azatlıqqa nindi dä bulsa añlatma birmäsä dä, bülekçäneñ wäkilläre räsmi bulmağan söyläşüdä älege köndäşlektän qurıqmawların belderde. Bez üzebezneñ passajirlarıbıznı yuğaltmayaçaqbız, digän fikerdä toralar Lufthansada. Tatarstan aviakompaniäse wäkilläre isä, KD-avianıñ eş yünäleşen kiläçäkkä bik ütemle, kiräkle dip sanıy. Köndäşlektän dä ällä ni qurıqmıylar respublikada, çönki transport häm yul xucalığı ministrlığı wäkilläre süzlärenä qarağanda, bezdä oçqıçlarda yörüçelärneñ sanı yılğa 15-20 protsentqa üsä bara. Alay da, Tatarstan aviakompaniäseneñ general’ direktorı Möxämmät Zakarcaev fikerençä, Tatarstanğa yaña aviakompaniä kilüe bügenge köndä eş itüçe hawa şirkätläreneñ Mäskäw reyslarında xalıqnıñ sanın kimetäçäk.

Gölnaz İlgizär

XS
SM
MD
LG