Accessibility links

дүшәмбе, 5 декабрь 2016, Казан вакыты 21:45

Rusiä, çit xoquq saqçıları Qazanğa cıyıldı


21nän 23 yüngä qädär ütüçe Xalıqara politsiä berläşmäseneñ 11 konferensiäsendä Tatarstan, Rusiäneñ 50 töbäge Avstriä, Pol'şadan kilgän xoquq saqçıları cıyılıp söyläştelär, ber-bersenä büläklär, tüş tamğaları bireştelär, üzläre turında yuğarı ruxlı cırlar tıñladılar. Xalıqara politsiä assotsiatsiäseneñ 11 konferensiäse citdi çara kebek toyılsa da, ul Qazan sabantuyı aldınnan xoquq saqçılarınıñ üzlärençä bäyräm itüläre ide. 22 iyündä Qazan üzägendäge Tatarstan eçke eşläre ministrlığınıñ Menjinskiy isemendäge mädäniät binasındağı cıyılışnı xalıqara politsaylar berläşmäseneñ Rusiä bülegeneñ citäkçese Aleksey Ğan'kin açıp cibärde. Qırıyında utıruçı Tatarstannıñ eçke eşlär ministrınıñ urınbasarları üzläreneñ yaxşı eşläwläre turında söyläde. Äle 20 iyündä genä alar telekanalları arqılı qanunsız, idän astında eşlängän diskklarnı yuq itülären kürsätkännär ide. Ul lazer tälinkäläre arasında tatarça cırlar cıentıkları bulğan ikän. Bez söyli başlağan cıyılışta Tatarstan xoquq saqçılarınıñ töp başlığı Äsğät Säfärov üze yuq ide, eşlekle säfärgä kitte dip añlattılar. Militsiäneñ yuğarı qatlamı äğzaları cıyılışın Pol'şa belän Avstriädän kilgän qunaqlar qolaq caylanması aşa tärcemäçelärne tıñlap utırdılar. Nihayät alarğa da süz birelde. Rusiä xoquq saqçıları ber-bersen maqtağaç, büläklär öläşkäç şul ağımnan qalmasqa buldılar. Çit il militsionerları bu çaranı oyıştıruçılarğa cılı süzlären citkerdelär. Tatarstan xoquq saqçılarınıñ başlığı urınbasarı Fuat Zinnurovqa alıp kilgän “quyan küçtänäçlären” birdelär. Här büläk, tüş tamğa alğan politsiä äğzası “Watanğa xezmät itäm!” dip qabatladı, zal alqışlarğa kümelde Bu çaralar kiçkä qädär däwam itte, politsaylarnı Tatarstan başqalasınıñ kürsäterlek urınnarına säyäxät, İdel buyınça korabta yözü oyıştırıldı. Kiçen qimmätle “Parus” restoranında küñel açtılar. Röstäm İsxaqi

XS
SM
MD
LG