Accessibility links

шимбә, 3 декабрь 2016, Казан вакыты 16:45

Akademiklarnı saylawlar däwam itä


Gumanitar fännär bülegeneñ utırışında akademiägä şäräfle äğzalar qabul itü mä’säläse qaraldı. Tatarstan Fännär akademiäseneñ şäräfle äğzası itep Tatarstan xalıq yazuçısı, dramaturg Tufan Miñnullin, Tatarstan xalıq şağire Räwil Fäyzullin, Tatarstan häm Rusiäneñ xalıq artistı Şäwkät Biktimerov häm Tömän ölkäsendä yäşäwçe professor Xanisä Alişina täqdim itelde. Älege isemlekkä kergän şäxeslärneñ dürtese dä akademiäneñ ğomum cıyılışında qaralaçaq. Kürenekle xezmätkärlärneñ Tatarstan Fännär akademiäsenä saylanuı ğalimnär oyışmasınıñ ädäbiät, sänğät'kä iğtibarı üsüen kürsätä.

Comğa könne isä, sotsial'- iqtisadi, fizika, ximiä, awıl xucalığı fäne büleklärenä akademiklar häm möxbir äğzalar saylaw uzdı. Saylawlar traditsion räweştä, TR Fännär akademiäse ustavı häm saylawlar xaqındağı qağidälär nigezendä uza. Cıyılışta kandidatlarnıñ çığışları häm alarnıñ xezmättäşläreneñ fikerläre tıñlandı. Fiker alışu yäşeren tawış birü belän tögällände. Mäsälän, “İqtisat häm awıl xucalığı belän idärä itü” belgeçlegendä 4 nämzät: Tatarstan prezidentı kiñäşçese Marat Safiullin, “TİSBİ” idärä akademiäsennän Sergey Kiselev, Qazan däwlät texnik universitetınnan Damir Xayrullov, Tatar däwlät gumanitar- pedagogik universitettan Vadim Xomenqo däğwä beldergän. Ber kön elek kenä Qazan däwlät texnologik universitetı rektorlar bäygesendä ciñep çıqqan German D'yakonov belän texnopark “İdeya” citäkçese Sergey Yuşqo “Ximik texnologiä” belgeçlegenä möxbir äğzalıkkä saylandılar.

“Belem birüdä pedagogik häm informatsion texnologiälär” belgeçlege buyınça barı 2 genä nämzät: Qazan däwlät texnologik universitettan Nailä Wälieva häm Qazan däwlät universitetınnan Cäwdät Söläymanov ide. Yäşeren saylawlardan soñ Cäwdät Söläymanov xaqiqi äğzalıqqa iñ küp tawış cıydı.

“Fälsäfä” belgeçlegendä möxbir äğzalekkä Qazbek Gizatov, Eduard Qul'pin- Ğubaydullin, Nail Möxtärämovlar arasında barğan saylawlar ozaqqa suzıldı.

Läkin älege saylanğan nämzätlär Tatarstan Fännär akademiäseneñ 26-27 iyünendä uzaçaq cıyılışında raslanğannan soñ ğına xaqiqi yäki möxbir äğza bularaq tanılu alaçaqlar. El'mira Gazizova

XS
SM
MD
LG