Accessibility links

шимбә, 10 декабрь 2016, Казан вакыты 13:56

Mäskäwdä Xalıqara Film Festivale açıldı


Yünneñ soñğı atnası buyı Mäskäwdä Xalıqara Film festivale baraçaq. Bıyıl ul inde 29 märtäbä ütkärelä. Atnakiç açılğan şuşı film bäyrämendä bu yulı urıs telendä töşerelgän äsärlärgä zur iğtibar birelä, anda elekke sovet respublikalarında töşerelgän filmnar şaqtıy.

Mäskäwdä yıl da ütä torğan şuşı film festivale xäzer dönyadağı iñ borınğılarınnan berse bulıp tora, berençe märtäbä ul 1935-nçı yılda uzğan. Şuşı olı yäşe yağınnan ul barı tik Venetsiädäge film festivalennän genä qalışa.

Ämma Mäskäw Film festivale räsmän Berlin, Cannes, şul uq Venetsiä film festivalläre kebek A däräcäsendä bulsa da, ul dönyaküläm abruyın äle qazana başlaw aldında ğına tora.

Sovetlar Berlege tarqaludan soñ ildäge film industriäse zur tetränü kiçerep, ayağına ul nihayät soñğı yıllarda ğına basa başladı. Bıltırğı festivaldä, misal öçen, urıs telendä ber genä film - Aleksey Muradovnıñ "Çerv" digän eşe qatnaşsa, bıyıl inde urıs telle filmnarğa töp iğtibar birelä diärgä bula. Alar, älbättä, küp tügel, töp konkursqa alınğan 19-dan 3-se genä, ämma elekke yıllar belän çağıştırğanda bu inde zur san.

Film kritiklarınıñ xalıqara berläşmäse räise Andrey Plaxov:

"Bıyılğı programmanıñ üzençälege şunda - şaqtıy ğına filmnar, öleşçä genä bulsa da, urıs telendä töşerelgän. Misal öçen, İzraildän "SSSR balaları" digäne, annarı Ukrainadan "Yılğa buyında" digäne, anda Rusiäneñ ike güzäl aktrisası uynıy, häm Gruziädän Aleko Tsabadzeneñ "Urıs öçpoçmağı" digän filmı. Ul Çeçnädäge suğış problemaları, alarnıñ näticäläre turında bik qızıqlı ber film", di Andrey Plaxov.

Töp programmadan tış Mäskäw Film festivale tamaşaçı iğtibarına ğädättägeçä konkursqa kermägän filmnarnı da täqdim itä. Häm alar Rusiäneke genä tügel, programmada Üzbäkstan, Yapuniä, Latviä, Ukraina, Quşma Ştatlar, Törkiä, Macarstan kebek illärdän kilgän äsärlärne kürep bula.

Uynalğan filmnardan tış Mäskäw festivale barışında "İrekle fikerläw" digän kategoriädä dokumental'' filmnar kürsätü dä bara, anda Qıtaydağı alternativ filmnar da täqdim iteläçäk. Ayırım itep mäşhür çex rejisserı Miloş Formannıñ berençe filmnarın kürep bulaçaq.

Mäskäw Film festivaleneñ xalıqara abruyı kütärelä başlawın anda kürenekle zatlarnıñ qatnaşuı da raslıy. Kilgän yoldızlar arasında, mäsälän, Serbiädän Emir Kusturicanı kürergä bula ide.

Kärim Kamal
XS
SM
MD
LG