Şimbä könne Başqortstannıñ räsmi wäkillege Sarıtaw ölkäsenä eş säfärenä bara. Respublika Prezidentı Mortaza Räximov citäkçelegendäge bu wäkillek şuşı baruda räsmi waqiğalar belän mädäni çaralarda qatnaşunı bergä oyıştıra. Wäkillek sostavına Başqortstan Xökümäte räiseneñ urınbasarları, berniçä ministr häm Bötendönya Başqort qorıltayı Başqarma komitetı räise Rumil Aznabaev häm başqa räsmi zatlar kerä.
Mäğlüm buluınça, Başqortstan belän Sarıtaw ölkäse arasında 2003 yılda Üzara xezmättäşlek häm duslıq turında Kileşü tözelgän ide. Älege säfär barışında ike taraf şul Kileşügä Berketmäne dä imzalayaçaq. Sarıtaw ölkäse belän Başqortstan Respublikası arasında iqtisadıy bäyläneşlär soñğı yıllarda yaña sulış aldı. Başqortstan Sarıtaw ölkäsenä, nigezdä, yağulıq-energetiqa tarmağı çimalların, şulay uq urman xucalığı tovarları, pıyala äyberläre häm başqa törle mallar ozata. Sarıtaw ölkäsennän isä Başqortstanğa başlıça xalıq qullanuı tovarları kiterelä. Mebel', konditer äyberlär, on, suıtqıçlar häm başqa mallar kiñ qullanış taba.
Äle Sarıtawğa barğaç, Başqortstan wäkillege ölkäneñ gubernatorı Pavel Lipatov belän oçraşular barışında Üzara duslıq häm xezmättäşlek Kileşüenä östämälär häm açıqlıqlar kertkän Berketmäne dä imzalıy. Şulay uq wäkillekkä kerüçe räsmi zatlar Sarıtawnıñ qayber şirkätlärendä, oyışmalarında oçraşularda bulaçaq.
Säfär barışında mädäni çaralar da qaralğan. Alarnıñ iñ zurısı Öst Kürdem poselogında ütä. Anda milli bäyräm – Sabantuyda qatnaşaçaq Başqortstannan barğan wäkillek äğzaları. Sabantuyda Ufadan barğan sänğat ostaları – Fäyzi Gaskärov isemendäge Başqortstan däwlät akademiä biyu ansamble belän “Dalan” estrada törkeme dä çığış yasayaçaq.
Ä kiläse atna azağında -30 iyündä Başqortstan Prezidentı Mortaza Räximov citäklägän zur wäkillek Mäskäwgä oça. Anda Başqortstannıñ Rus däwlätenä quşıluına 450 yıl tuluğa bağışlanğan bixisap çaralar häm Sabantuy ütäçäk.
