Accessibility links

дүшәмбе, 5 декабрь 2016, Казан вакыты 11:44

Törkiädä parlament saylawları häm terrorçılıq


Soñğı atnada da Törkiäneñ kön üzägendä ğomum saylawlar häm terror waqiğaları xökem sörde. Esse häm yañğırsız könnärgä qaramastan monnan aldağı saylawlardağı kebek aktiv häm xäräkätle räweştä bulmasa da partiälär saylaw kompaniyasen däwam itterä. Şul uq waqıtta ilneñ könyaq-könçığışında bäreleşlär waqıtında yäki yullarğa quyılğan minalarnıñ şartlawı arqasında şähit bulğan törek xärbiläreneñ arta baruı da xakimiätneñ iminlek şartların buldıruda häm terrorçılıq belän köräş ölkäsendä alıp barğan çaralarnıñ kim buluı räweşendäge tänqitläwlärgä dä säbäp bula.

Bu tänqitläwlärgä cawap itep premyer-ministr Recep Tayip Erdoğan, terror waqiğalarınıñ moñarçı da buluına işarä itep, terrorçılıq belän köräşneñ däwam iteläçägen, Ğiraqnıñ tönyağında xäzerge waqıtta xärbi xäräkät ütkärelüe fikerenä üzeneñ qarşı buluın, berençe çiratta Amerika Quşma Ştatları häm Ğiraq belän diplomatik yullarnı qullanuğa östenlek birülären belderde, läkin kiräk bulğan oçraqta çikneñ aryağındağı xärbi xäräkät variantınıñ da kön tärtiplärendä buluın assızıqlap äytep uzdı.

Tışqı eşlär ministrı häm premyer-ministr urınbasarı Abdullah Gül dä xökümät belän törek qorallı köçläre arasında terrorçılıq belän köräş häm çikneñ aryağında operatsiya ütkärü mäs’äläsendä qaraş ayırmalılıqlarınıñ bulmawına basıp yasap: “ Mondıy möhim mäs’älädä tulısınça kiñäşläşep häm zur qatiliq belän xäräkät itäbez,” – dip äytte.

Şul uq waqıtta başqalada şuşı könnärdä bu mäs’älä belän bäyle bularaq ilbaşı, xökümät wäkilläre häm xärbilär arasında oçraşular häm kiñäşmälär dä ütkärelä.

Şul arada törle urınnarda bomba quyıluı turında iminlek köçlärenä xäbärlär dä kilep tora. Soñınnan xäbärlärneñ kübese diärlek döres bulıp çıqmasa da tieşle iminlek çaraları kürelergä mäcbür bula.

Äytik, şundıy ber xäbär törek hawa yullarınıñ İstanbuldan Ankarağa säfär yasawçı ber yulçı oçqıçında bomba buluı turında ide. Oçqıç İstanbuldan xäräkät itär aldınnan citkerelgän bu xäbär arqasında oçqıçtağı böten yulçılar töşerelep, imin urınğa ozatıldı. Täfsille tikşerüdän soñ xäbärneñ yalğan buluı añlaşıldı.

22 iyüldä ütkäreläçäk ğomum saylawlarnıñ täğäyen namzät isemlege açıqlandı.

Yaña parlamentqa kerergä teläuçe 7 meñ 395 namzätneñ 726-sı bäysez xalıq wäkile namzäte. Küpçelege yuğarı belemle bulğan namzätlärneñ 950-gä yaqını isä – başlanğıç mäktäpne betergän. Namzätlär arasında akterlar, aşçılar, balıqçılar, rässamnar häm xätta massajistlar da bar. Xalıq wäkile namzäte isemlegenä 230 xucabikä dä kergän.

Namzatlär arasında küpçelekne isä layıqlı yaldağılar, pensionerlar täşkil itä. İkençe urında eşmäkärlär, möxändis-injenerlar, uqıtuçılar, advokatlar häm tabiplar tora.

XS
SM
MD
LG