Accessibility links

якшәмбе, 4 декабрь 2016, Казан вакыты 02:53

Gäzitlärdä respublika tormışı


Başqortstandağı ictimaği-säyäsi, milli-mädäni wäzğıätne respublikada näşer itelüçe häm respublikada taratıluçı gäzitlär şaqtıy däräcädä açıp birälär. Başqortstannıñ barlıq räsmi mäğlümat çaralarında da qayber başqort qabiläläreneñ Mäskäw kenäzlegenä kerä başlawlarınıñ 450 yıllığı teması östenlek itä. Şunısı da küzgä taşlana – bu temağa bağışlanğan yazmalarda, nigezdä, ber balıq başı çäynälä: başqortlar 450 yıl elek “aq patşağa” baş birep döres eşlägännär, urıslarğa quşılu tatar xanlıqları izüennän qotılırğa yärdäm itkän h.b. .hb.

Başqort telendä çığuçı gäzitlär daimi räweştä tel, mädäniät, mäğärif problemaların kütärep çığalar.Şulay, “Başqortstan” gäziteneñ 22 iyün sanında başqort telendä näşer qılınğan kitaplarnıñ kibetlärdä satılmıyça yatuına tirän borçılu belderelä. Mäqälädä, başqort telendäge kitaplarnı näşer itü häm alar belän säwdäne oyıştıru däwlät yaqlawında bulırğa tieş, digän näticä yasala.

Tatar telendä çığuçı “Qızıl tañ” gäzite tatar milli problemaların bötenläy kütärmi diärlek. Bu atnadağı gäzit bitlärendä 450 yıllıq, Salawat könnäre, respublika yañalıqları urın alğan.

Kürşe Çiläbe ölkäsendä basılıp Başqortstanda taratıluçı berdänber oppozitsion gäzit - “Beloretskiy subbotniy kur'yer”nıñ 3 sanında Başqortstannıñ yağulıq-energetiqa kompleksı tiräsendäge mutlaşular, urlaşular, cäncallar töp urınnı alğan. Bilgele keşe xoquqların yaqlawçı, “Keşe xoquqları öçen” Bötenrusiä ictimaği xäräkäteneñ Başqortstan buyınça bülekçäse citäkçese İldar İsängulov belän birelgän äñgämädä Başqortstanda xoquq saqlaw orğannarınıñ, kiresençä, keşe xoquqların bozuları faktları kiterelä. Şul uq waqıtta, İldar İsängulov xoquqçılar fäqät ğadi xalıqnı ğına yaqlıy, digän tezisnı kire qağa. Älege könne bez zindanğa yabılğan Başqortstannıñ eks-senatorı İğor İzmest'yev tiräsendäge xällärne öyränäbez, aña qarata taşlanğan naxaq ğayıpläwlärne tikşeräbez. Ägär, di İldar İsängulov, soraw alular waqıtında Başqortstan prezidentı Mortaza Räximovnı tuqmıy-cäzalıylar ikän, bez anı da yaqlap çığaçaqbız.

Kärim Yauış, Ufa

XS
SM
MD
LG