Accessibility links

җомга, 2 декабрь 2016, Казан вакыты 21:10

Tatarstanda xatın-qız ministrlar kimi


Tatarstan Xökümätendä soñğı waqıtta üzgäreşlär kübäyep kitte. Äle yaqın könnärdä genä sotsial' yaqlaw belän xezmät häm mäşgul'lek ministrlıyğın berläşterep quyıp yaña citäkçe bilgelägännär ide hiç kötmägändä, düşämbe könne isä Tatarstan äylänä tirä moxit häm tabiği baylıqlar ministrlığınıñ citäkçese üzgärde. İrina Laroçkina urınına Bua xakimiäte başlığı bulıp xezmät itkän Äğläm Sadretdinov quyıldı. Äytergä kiräk, kiñ cämäğätçelekkä İrina Laroçkiananıñ kitüenä qarağanda, yaña ministr itep Äğläm Sadretdinovnıñ bilgelänüe ğäcäp buldı. Çönki küp waqıtta “glavalarnı” berär şaw-şu qupqanda-xalıq qänäğätsez bulğanda almaştıru ğädätkä kergän, ä Äğläm Sadretdinovnıñ bu ölkädä gönahları yuq ide kebek. Soñğı ber ayda ğına ministr wazıyfalarınnan ike xatın-qız azat itelde. Berse sotsial' yaqlaw ministrı Klavdiä Novikova, ikençese – Lyudmila Laroçkina. Xäzerge waqıtta xatın-qızlardan ministr bulıp respublikada barı mädäniät ministrı Zilä Wälieva ğına qaldı. Anıñ qarawı Tatarstan Prezidentı Mintimer Şäymiev soñğı waqıtta üzeneñ däwlät kiñäşçeläre itep xatın-qızlarnı quya. Yıl başında Tat'yana Larionova sotsial' mäs'älälär buyınça däwlät kiñäşçese itep bilgelängän ide, menä xäzer İrina Laroçkina - cir astı baylıqlarınnan faydalanu, neft', ğaz häm ekologiä mäs’äläläre buyınça kiñäşlär citkeräçäk prezidentqa. Döresen genä äytkändä, Federatsiä Şurasında eşlägännän soñ, ekologiä- äylänä tirä moxit häm tabiği baylıqlar ministrı bulu İrina Laroçkinağa tös tügel ide kebek. Bu xezmätne ul üze dä yaqın itmäde bulsa kiräk, çönki soñğı waqıtta respublikada bu ölkädä älläni zur üzgäreşlär bulmadı. Ministr bulıp ul barı 2 yıl ğına xezmät itte. Geologiä fännäre doktorı İrina Laroçkina Älmättä tuıp üskän häm şaqtıy waqıt neft' ölkäse tiräsendä xezmät itkän. Dimäk, prezident kiñäşçene belep saylağan. Bilgele, bu Laroçkinanı kütärü buldı. Bua başlığı Äğläm Sadretdinovnı kebek. Ägär İrina Laroçkinanı yaña urınğa bilgeläw küplärgä ğädäti toyılsa, Bua rayonı xaqimiäte başlığı Äğläm Sadretdinovnı äylänä ekologiä –äylänä tirä moxit häm tabiği baylıqlar ministrı itep quyu küplärne ğäcäpkä qaldırdı. Nik digändä, Sadretdinov bulğanda Bua şaqtıy üseş aldı, rayon xalqı da anı şaqtıy üz itte. Qartayğançı şul urında utırır tösle ide. Sadretdinov citäklägän çorda Bua iñ çista rayonğa äylände. Awıl xucalığı fännäre kandidatın ekologiä ministrı itep quyu bälki şunıñ belän bäyleder, ä bälki başqa cılıraq urın bulmağanğadır. Çönki Äğläm Sadretdinovnı inde küptän Qazanğa cıyına dip söylilär ide. Sadretdinov Apas rayonı xakimiäte başlığı bulğanda Äğläm äfände häm rayon xalqı arasında añlaşılmawçanlıq çıqqan ide. Näq şul waqıttan birle Qazan turındağı imeş-mimeşlär yörde. Läkin ul çaqta Äğläm äfände Buağa başlıq itep quyıldı – 1998нче yılda. Häm bu wazıyfada 10 yılğa yaqın eşläde. 55 yäşlek Äğläm Sadretdinov tumışı belän Çuaşstannıñ Komsomol rayonı Çiçkän awılınnan. Bua häm Çuaşstanlılar anı härwaqıt üzebezneñ mişär dip ğorurlanalar ide. Çönki ul rayon başlıqları arasında härwaqıt maqtalıp kilde. Xäzer Buağa kem citäkçe itep quyılır älegä bilgele tügel. İmeş-mimeşlär törle. Räsmi bulmağan mäğlümatlarğa qarağanda, Apas keşese, xäzer Tübän Novgorodtağı Serğaç şikär zavodında xezmät itüçe Räis Yärullin yäisä Buanıñ “Vamin” şirkäte citäkçese Fänil Şäexgattarov quyıla ikän digän süzlär yöri.

Landış Xarrasova

XS
SM
MD
LG